Sarapshylar Joldaýdaǵy strategııalyq mindetterdi talqylady
ASTANA. KAZINFORM — QR Prezıdenttik ortalyǵynda Memleket basshysynyń Qazaqstan halqyna Joldaýynyń negizgi baǵyttary talqylandy. Sarapshylar ekonomıkalyq, áleýmettik jáne quqyqtyq mindetterdiń el damýy úshin mańyzyn atap ótti, dep jazady Kazinform tilshisi.
QR Prezıdenttik ortalyǵynyń dırektory Baqytjan Temirbolat Joldaýdy qoǵamdy jańǵyrtýdyń mańyzdy kezeńi dep baǵalady. Onyń aıtýynsha, qujat jańa Konstıtýtsııamen sabaqtasyp, eldiń ishki damýyndaǵy ózgerister men halyqaralyq jaǵdaıdy eskeredi.
— Joldaýdyń negizgi maqsaty — eldi aýqymdy jańǵyrtý. Onda Qazaqstandy Eýrazııanyń jetekshi logıstıkalyq ortalyǵyna aınaldyrý, energııa profıtsıtine qol jetkizý, sý tapshylyǵyn sheshý, «Halyqtyq qurylys» bastamasyn iske asyrý, jańa Azamattyq kodeks ázirleý, jasandy ıntellekt pen tsıfrlyq tehnologııalardy engizý jáne eń tómengi jalaqyny arttyrý mindetteri qamtylǵan, — dedi Baqytjan Temirbolat.
Quryltaı depýtaty ıÝlııa Kýchınskaıa Joldaýdaǵy basymdyqtardyń qoǵam suranysymen úndes ekenin atap ótti.
— Joldaý eldiń odan ári damý baǵyttaryn aıqyndaıdy. Infraqurylymdyq jáne áleýmettik-ekonomıkalyq mindetterdi oryndaý jańa saıası qurylymnyń tıimdiligin kórsetedi. Óńirlerge sapar men saılaýshylarmen kezdesýler barysynda kóterilgen máseleler Joldaýdaǵy basymdyqtarmen sáıkes keledi. Bul qujattyń praktıkalyq mańyzyn arttyrady, — dedi depýtat.
Al Zańnama jáne quqyqtyq aqparat ınstıtýtynyń dırektory Janar Jigitekova Joldaýdaǵy mindetterdi iske asyrý úshin zańnamany zaman talabyna saı jetildirý qajet ekenin aıtty.
— Quqyqtyq negiz eldegi ekonomıkalyq jáne tehnologııalyq ózgeristerge saı bolýy kerek. Zańnama azamattar men bızneske naqty baǵdar berip, olardyń quqyqtaryn qorǵaýǵa jáne damýyna jaǵdaı jasaýy tıis, — dedi ol.
Buǵan deıin Quryltaı depýtaty Ashat Aımaǵambetov ustazdardy qoldaý Prezıdenttiń aıryqsha nazarynda ekenin jetkizgen bolatyn.
