Sarapshylar Taldau talks podkastynda óńdeý ónerkásibiniń keleshegin talqylady
ASTANA. KAZINFORM - Taldau Talks podkastynyń kezekti shyǵarylymy jaryq kórdi. Ol týraly Parlament Senatynyń tóraǵasy Máýlen Áshimbaev Facebook-tegi paraqshasynda jazdy.
Jańa shyǵarylymǵa Qazaqstanda óńdeý ónerkásibin damytý máselesi arqaý boldy. Oǵan Ónerkásip jáne qurylys mınıstri Qanat Sharlapaev, kásipker, Óńdeý ónerkásibi odaǵynyń basqarma tóraǵasy Marat Baqqulov jáne ekonomıst Aıdarhan Qusaıynov qatysyp, salaǵa qatysty túıtkilderdi talqylady.
Máýlen Áshimbaev atap ótkendeı, óńdeý ónerkásibin damytý elimizde ózekti máselelerdi ońtaıly sheshýge jol ashady.
Sondaı-aq ol sońǵy jyldarda bul salada belgili bir jetistikterge qol jetkizilgenin tilge tıek etti. Sonyń nátıjesinde óńdeý ónerkásibindegi óndiris kólemi 5 jylda 2 eseden astam ósip, 5,9 paıyzdy qurady. Senat Tóraǵasynyń aıtýynsha, mundaı úrdis ekonomıkanyń ártaraptanǵanyn jáne shıkizat sektoryna táýeldiliktiń tómendegenin kórsetedi. Degenmen, áli de jetildirýdi qajet etetin ózekti máseleler bar.
«Memleket basshysy Qasym-Jomart Kemeluly Toqaev jańa ekonomıkalyq saıasat aıasynda elimizdiń berik ónerkásibin qalyptastyrý mindetin júktedi. Óńdeý ónerkásibi sonyń negizi bolmaq. Atalǵan sektor bul saladaǵy keleshegi zor baǵyttardyń biri ekeni sózsiz. Óńdeýshi ónerkásipti damytpaı ekonomıkanyń sapaly ósýin, ony ártaraptandyrýdy, ekonomıkalyq jáne azyq-túlik qaýipsizdigin, halyq tabysynyń artýyn, salyq bazasynyń ulǵaıýyn qamtamasyz etý óte qıyn. Eger óńdeý ónerkásibiniń qurylymyn taldaıtyn bolsaq, onda jalpy kólemniń 40 paıyzyn metallýrgııa alady. Sondyqtan qosylǵan quny joǵary ónim shyǵaratyn salanyń ozyq sektorlaryn damytýdyń mańyzy zor», – dedi Senat tóraǵasy.
Sarapshylar Taldau Talks podkastynda óńdeý salasynyń jaǵdaıy men beleń alǵan úrdisterdi talqylady. Atap aıtqanda, qarjylandyrýǵa qol jetkizý, otandyq ónimniń ımporty men básekege qabilettiligi, kásiporyndardy qoljetimdi shıkizatpen qamtamasyz etý, sondaı-aq, ishki naryqty qorǵaý, Qazaqstannyń eksporttyq áleýeti jáne memlekettik qoldaý tetikteriniń tıimdiligi sııaqty máselelerge mán berildi.
Podkasttyń tolyq nusqasyn Parlament Senatynyń resmı YouTube-arnasynan kóre alasyzdar.
Aıta keteıik, buǵan deıin senatorlar eńbek resýrstary jóninde dóńgelek ústel ótkizgen bolatyn.