Sarapshylar saılaý kezinde áleýmettik suranystardy eskerýdiń mańyzyn atap ótti
ASTANA. KAZINFORM - Astanada QR Mádenıet jáne aqparat mınıstrliginiń qoldaýymen Qazaqstandyq qoǵamdyq damý ınstıtýty uıymdastyrǵan «Adam jáne onyń ómir súrý sapasy: saılaý kún tártibindegi basymdyqtar» taqyrybynda «Sarap» sarapshylar klýbynyń otyrysy ótti.
Mınıstrliktiń baspasóz qyzmetiniń habarlaýynsha, sarapshylar azamattardyń ómir súrý sapasy jáne bul máseleniń qoǵamdyq-saıası kún tártibinde kórinis tabýy jóninde pikir almasty.
Halyqtyń ál-aýqatyna tikeleı áser etetin densaýlyq saqtaý, bilim berý, áleýmettik qorǵaý jáne adamı kapıtaldy damytý máselelerine basa mán berildi.
Sonymen qatar qazirgi basymdyqtardyń jańa Konstıtýtsııada bekitilgen áleýmettik qundylyqtarmen, azamattardyń aldaǵy saılaýdan kútetin nátıjelerimen sáıkestigi talqylandy.
Saılaý kezeńinde júrgiziletin áleýmettik zertteýlerdiń mańyzyna da erekshe nazar aýdaryldy.
Kezdesý sońynda sarapshylar azamattardyń áleýmettik suranystaryn júıeli túrde eskerý, keri baılanys tetikterin jetildirý jáne qoǵamdyq-saıası kún tártibin qalyptastyrýda senimdi áleýmettik derekterdi paıdalaný mańyzdy ekenin atap ótti.
Osyǵan deıin qazaqstandyqtardyń 73,8%-y Quryltaı saılaýynda daýys berýge nıetti ekeni týraly jazdyq.
