Sarapshylar Ortalyq Azııadaǵy gıdrogeologııanyń negizgi máselelerin talqylady
ASTANA. KAZINFORM — Astanadaǵy GEOSCIENCE & EXPLORATION CENTRAL ASIA halyqaralyq forýmynyń qatysýshylary sý resýrstaryn turaqty basqarýdaǵy gıdrogeologııanyń alar ornyn talqylady.
Talqylaý barysynda klımattyń ózgerýi jaǵdaıynda jerasty sýlary sý qaýipsizdiginiń mańyzdy elementine aınalǵany atap ótildi. Sarapshylardyń aıtýynsha, óndiris pen tabıǵı toltyrý arasynda balans saqtalsa, bul resýrs turaqty sýmen qamtamasyz etýge jáne aýyl sharýashylyǵyn damytýǵa sep bolady.
Forýmǵa qatysýshylardyń aıtýynsha, Qazaqstanda aýqymdy jer asty sý qory bar. Ol egistikti sýarýǵa da jetkilikti. Buǵan deıin elde óndirilgen dándi daqyl kólemi qalypty nátıjeden aıtarlyqtaı joǵary, aýqymy birneshe myń gektarlyq sýarmaly egis alqabyn jasaý tájirıbesi boldy. Qazirgi ýaqytta zamanaýı tehnologııalardy qoldana otyryp sol dástúrdi jańǵyrtý múmkindigi qarastyrylýda.
Osy turǵyda mamandar sý resýrstaryn jergilikti deńgeıde bólý úshin naqty derekterdiń joqtyǵy qolbaılaý ekenine nazar aýdardy. Sol sebepti mindetti túrde jer asty sýlarynyń kartografııasyn jasaý jáne baǵalaý, ekologııalyq táýekelderdiń aldyn alý úshin gıdrogeologııalyq aýdıtti damytý joldary usynyldy.
Jıyn barysynda KAZ Minerals Tobynyń 3D modeldeý ujymynyń jetekshisi Natalıa Vıttıh-Nı forým mańyzdylyǵyna óz baǵasyn berdi.
— Forýmdy katalızator retinde qarastyramyz: munda sheshimder qabyldanbaıdy, biraq olardyń — áriptestik arqyly, ınvestıtsııalyq kelisimder men birlesken jobalardy iske qosý arqyly paıda bolýyna jol ashylady, — dedi ol.
Natalıa Vıttıh-Nı Qazaqstannyń ustanymyn baǵalaı kele, eldiń jekelegen resýrstar boıynsha áleýeti aýqymdy, pozıtsııasy turaqty ekenin, biraq geobarlaýdyń tehnologııalyq quramdas bóliginiń kúsheıtilýi qajettigin atap ótti.
— Negizgi baǵyttar tsıfrlyq transformatsııa, ınvestıtsııalyq tartymdylyqty arttyrý jáne jańa kadrlar býynyn damytý bolý kerek, — deıdi Natalıa Vıttıh-Nı.
Forým barysynda birneshe qatysýshy memlekettik nagradalarmen marapattaldy. Olardyń qatarynda KAZ Minerals ókilderi: «Eńbek sińirgen geolog» tósbelgisin alǵan Natalıa Vıttıh-Nı, QR Indýstrııa jáne ınfraqurylymdyq damý mınıstrliginiń Qurmet gramotasyna ıe bolǵan Maqmut Kelisuly, Arman Teljanov jáne Tatıana Chernova bar.
Forým jumysyna taý-ken, metallýrgııa jáne munaı-gaz salalaryndaǵy iri kompanııalar «QazMunaıGaz», Shell, ERG t.b kompanııalardyń ókilderi qatysýda.
