Sarapshylar oqýshylardyń óz densaýlyǵyna kózqarasyn zertteıdi
ASTANA.KAZINFORM - Qazaqstanda HBSC halyqaralyq zertteýiniń úshinshi kezeńi – «Mektep jasyndaǵy balalardyń densaýlyqqa qatysty minez-qulqy» atty joba bastaldy.
Oǵan elimizdiń barlyq óńirinen 5, 7 jáne 9-synyp oqýshylary qatysyp jatyr.
HBSC – World Health Organization uıymymen yntymaqtastyqta júzege asyrylatyn mektep oqýshylarynyń densaýlyǵyn zertteýge arnalǵan eń iri halyqaralyq jobalardyń biri.
Zertteý tórt jylda bir ret biryńǵaı halyqaralyq hattama boıynsha HBSC jelisine qatysýshy 51 elde bir mezgilde ótkiziledi.
QR Densaýlyq saqtaý mınıstrligi málimetinshe, Qazaqstan bul zertteýge úshinshi ret qatysyp otyr: alǵashqy kezeńi 2018 jyly, ekinshisi 2022 jyly ótken.
Bul jaı ǵana saýalnama emes, balalar men jasóspirimderdiń óz densaýlyǵyna qatysty pikirin anyqtaýǵa múmkindik beredi.
Saýalnamada fızıkalyq jáne psıhıkalyq densaýlyq, tamaqtaný, dene belsendiligi, uıqy, zııandy ádetter, býllıng jáne kıberbýllıng, mektep ortasy, ata-analarmen jáne dostarmen qarym-qatynas, tsıfrlyq minez-qulyq, áleýmettik ál-aýqat jáne balalardyń ómir súrý jaǵdaılary sııaqty densaýlyqtyń keń aýqymdy máseleleri qamtylǵan.
Zertteý nátıjeleri ǵylymı negizdelgen josparlaý, profılaktıkalyq baǵdarlamalardy monıtorıngteý jáne baǵalaý úshin, sondaı-aq balalar men jasóspirimderdiń densaýlyǵyn saqtaý jáne nyǵaıtý salasyndaǵy memlekettik saıasatty qalyptastyrý men jetildirý maqsatynda paıdalanylatyn bolady.
Qazaqstandyq oqýshylar ekologııalyq máselelerdi sheshýge arnalǵan sýasty robotyn jasaǵanyn jazǵan edik.
