Sarapshylar maýsym aıyndaǵy úzdik smartfondar reıtıngin jarııalady
ASTANA. KAZINFORM — AnTuTu benchmark platformasynyń ázirleýshileri 2026 jyldyń maýsym aıyna arnalǵan smartfondardyń dástúrli reıtıngin usyndy. Bul týraly 24kg jazdy.
Reıtıngtiń kóshin OPPO K13 Turbo 5G bastady. Baǵasy 300 AQSh dollarynan tómen bul model Nubia, OPPO, vivo, Xiaomi jáne HONOR kompanııalarynyń flagmandyq smartfondaryn basyp ozdy.
Smartfon paıdalanýshylardan 96,83% oń baǵa alǵan. Ol Dimensity 8450 protsessorymen, 6,8 dıýımdik AMOLED dıspleıimen, 7000 mA·saǵ syıymdylyqtaǵy batareıasymen, 80 Vt jyldam qýattaý júıesimen jáne 50+2 megapıkseldi qos kameramen jabdyqtalǵan.
Sarapshylardyń pikirinshe, modeldiń joǵary baǵalanýyna qoljetimdi baǵasy men tehnıkalyq múmkindikteriniń úılesimi sebep bolǵan. Alaıda onyń basty kemshiligi — kamerasynyń qarapaıym bolýy.
Ekinshi orynǵa Nubia Z80 Ultra jaıǵasty. Bul model 96,67% oń pikir jınaǵan. Smartfon Snapdragon 8 Elite protsessorymen, 144 Gts jańartý jıiligi bar 6,85 dıýımdik AMOLED ekranymen, 7200 mA·saǵ batareıasymen jáne 90 Vt qýattaý júıesimen jabdyqtalǵan.
Qurylǵynyń kamera blogyna 50 megapıkseldi negizgi modýl, 50 megapıkseldi ýltra keń buryshty kamera jáne 64 megapıkseldi perıskopııalyq telefoto kamera kiredi. Buǵan deıin bul smartfon reıtıngte birinshi orynda turǵan. Sarapshylar onyń kóshe fotosýretterine qolaıly obektıvterin jáne jeke túsirý batyrmasyn erekshe atap ótti.
Úshinshi oryn OPPO Find X8 Ultra modeline buıyrdy. Ol 95,37% oń baǵa jınaǵan.
Smartfon Snapdragon 8 Elite chıpimen, 6,82 dıýımdik 2K AMOLED dıspleıimen, 6100 mA·saǵ batareıasymen, 100 Vt symdy jáne 50 Vt symsyz qýattaý júıesimen jabdyqtalǵan.
Kamera júıesine 50 megapıkseldi negizgi, 50 megapıkseldi ýltra keń buryshty, 50 megapıkseldi úsh ese optıkalyq zýmy bar telefoto jáne 2 megapıkseldi Danxia Original Color modýli kiredi. Sonymen qatar qurylǵyda Hasselblad kompanııasynyń tús berý tehnologııasy qoldanylǵan.
OPPO Find X8 Ultra osymen qatarynan úshinshi aı úzdik úshtik qatarynan túspeı keledi.
Eske sala keteıik, buǵan deıin Qytaı kádimgi smartfon arqyly alǵashqy spýtnıktik qońyraý jasady.
