Sarapshylar qazaqstandyq astyq eksportyndaǵy kidiristiń sebebin túsindirdi

ASTANA. KAZINFORM – Qytaı jáne Ózbekstan baǵyttarynda qazaqstandyq astyq tıelgen vagondardyń turyp qalýy baıqalyp otyr. Mundaı jaǵdaı bıylǵy rekordtyq ónim kólemi men kórshi elder tarapynan suranystyń kúrt ósýimen baılanysty.

«Astyq Trans» AQ vıtse-prezıdenti Jandos Qýanyshev astyqty eksportqa jetkizý kezindegi ýaqytsha qıyndyqtardyń negizgi sebepterin túsindirdi. Onyń aıtýynsha, qazaqstandyq astyqtyń shamamen jartysy Ózbekstanǵa eksporttalady. Alaıda qazirgi kezde ózbek termınaldary men elevatorlarynyń ótkizý qabileti tómendep, táýligine qabyldaıtyn júk kólemi 36 quramnan 30-ǵa deıin qysqarǵan.

«Sol sebepti Qazaqstan óz baǵyttarynda qozǵalystyń toqtap qalmaýy úshin jóneltýlerdi ýaqytsha shekteýge májbúr. Shekaranyń arǵy betindegi ýaqtyly túsirilmeý jolaýshylar men ishki tasymaldardyń júrýine kedergi keltirýi múmkin», – dedi Jandos Qýanyshev.

Osyǵan uqsas jaǵdaı Qytaı baǵytyna da tán. Qazaqstandyq eksport kólemi Qytaıdyń qaıta tıeý ınfraqurylymynyń ótkizý múmkindiginen asyp túsýde.

Buǵan qosa, shekarada astyq sapasyn anyqtaıtyn zerthanalardyń bolmaýy qosymsha kidiris týǵyzady, taldaýlardy Úrimshige nemese Beıjińge jiberýge týra keledi, bul júktiń rásimdelý ýaqytyn sozady.

«Qazaqstan temir joly» kompanııasy astyq tasymalyn erekshe baqylaýda ustap otyr. Vedomstvo málimetinshe, jaǵdaı birtindep turaqtalyp keledi. Úkimet eksport aǵyndaryn qaıta bólý tetikterin ázirleýde, onyń ishinde qashyq marshrýttarǵa tasymaldaý sýbsıdııalary qarastyrylýda. Sondaı-aq júktiń bir bóligin balamaly baǵyttarǵa jóneltý josparlanyp otyr, bul shekten tys júktelgen shekara ótkelderin jeńildetýge múmkindik beredi.

Aıta keteıik, bloger astyq eksportyna qatysty problemalardyń qalaı paıda bolatynyn anyqtady.