Sarapshylar ekonomıkanyń ósimi men munaı baǵasyna qatysty boljamdaryn ózgertti
ASTANA. KAZINFORM — Brent markaly munaı baǵasy, JІÓ, ınflıatsııa, bazalyq mólsherleme, taýarlar men qyzmetterdiń eksporty jáne ımporty, sondaı-aq teńge baǵamy – saýalnamanyń negizgi parametrleri boldy.
Ulttyq bank sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjesin jarııalady.
Ekonomıkadaǵy ósim men munaı baǵasy
Osy jyldyń tamyz aıynda saýalnamaǵa qatysqandar barlyq boljamdyq kezeńde munaı baǵasyna qatysty stsenarıılik kútýlerin jaqsartty. 2025 jylǵa Brent markaly munaıdyń medıanalyq baǵasy barrel úshin 68,9-dan 69,5 AQSh dollarǵa deıin kóterildi. 2026 jáne 2027 jyldary da baǵalar barrel úshin 69,5 AQSh doll. deńgeıinde turaqtanady dep kútilýde (buryn – barr. úshin tıisinshe 69,0 jáne 68,5 AQSh doll.).
Qazaqstannyń ekonomıkalyq ósý qarqyny boıynsha boljamdar 2025 jylǵa 5,1%-dan 5,2%-ǵa deıin, 2026 jylǵa 4,6%-dan 4,7%-ǵa deıin joǵary qaraı qaıta qaraldy. 2027 jylǵa ekonomıkalyq ósim 4,4% deńgeıinde kútiledi.
Inflıatsııa jáne bazalyq mólsherleme
Saýalnamaǵa qatysýshylardyń 2025–2026 jyldarǵa arnalǵan ınflıatsııalyq kútýleri joǵary baǵytqa qaraı yǵysa tústi. 2025 jyly ınflıatsııa – 11,3% deńgeıinde (buryn – 11,0%), 2026 jyly – 9,5% (buryn — 9,0%) bolady dep boljanady. 2027 jyly ınflıatsııalyq qysymnyń azaıýyna baılanysty boljam 7,0%-dan 6,5%-ǵa deıin tómendetildi.
Bazalyq mólsherleme boıynsha medıanalyq mánder 2025 jyldyń sońyna deıin 16,5% deńgeıinde saqtaldy. 2026 jylǵa bul kórsetkish 14,0%-dan 14,3%-ǵa deıin qaıta qaraldy. 2027 jyly ınflıatsııalyq qysymnyń báseńdeýine baılanysty mólsherleme 11,8%-dan 11,3%-ǵa deıin tómendeıdi dep kútiledi.
Saýalnamaǵa qatysqan respondentterdiń quramy týraly
Saýalnamaǵa Qazaqstan boıynsha makroekonomıkalyq kórsetkishterdi taldaýmen jáne boljaýmen aınalysatyn 13 uıym qatysty. Respondentterdiń qataryna naryqtyń kásibı qatysýshylary, zertteý ınstıtýttary, halyqaralyq uıymdar, sondaı-aq reıtıngtik agenttikter kiredi.
Makroekonomıkalyq saýalnamaǵa Ulttyq Bank boljamdary kirmeıtinin eske salamyz. Ol qazaqstandyq jáne álemdik naryqtardaǵy jaǵdaıdyń damý barysyna qatysty naryqtaǵy kásibı qatysýshylardyń táýelsiz pikirlerine, baǵalaýlaryna jáne kútýlerine jasalǵan sholýdan turady.
Aıta ketelik kredıt naryǵyndaǵy bıznes pen halyqtyń belsendiligi turaqty kúıinde qalyp otyr.