Sarapshylar Azııanyń qor naryqtarynyń quldyraý sebepterin atady
ASTANA. KAZINFORM – Astana Finance days konferentsııasynda ınvestıtsııalar salasyndaǵy ekonomıster Kazinform agenttigine Azııa qor naryqtarynyń quldyraýynyń yqtımal sebepterin atady.
Lazard Asset Management LLC Basqarýshy dırektory Mattıas Krýze Azııanyń qor naryqtarynyń quldyraý sebepteri retinde «sarry trades» (ártúrli paıyzdyq mólsherlemeler arqyly valıýta naryǵynda paıda tabý strategııasy) mańyzdylyǵyn jáne quldyraýdyń yqtımal trıggeri retinde japon naryqtarynyń tómen kiristiligin aıtýda.
Onyń aıtýynsha, Japonııadaǵy kiristilik deńgeıi AQSh jáne Eýropa naryqtarymen salystyrǵanda óte tómen bolyp qala beredi. «Carry trades» basqa jerlerde joǵary kiristi aktıvterge ınvestıtsııalaý úshin Japonııa sııaqty tómen paıyzdyq mólsherlemeleri bar elderden qaryz alýdy da qamtıdy. Dál osy tájirıbe naryqtyq kópirshikterdiń paıda bolýyna ákelýi múmkin.
AIX (Astana International Exchange) dırektorlar keńesiniń tóraǵasy Tımotı Bennett kerisinshe, Japonııa Azııanyń qor naryqtarynyń quldyraýyna esh áser etken joq dep sanaıdy. Onyń sebebi Qytaı ekonomıkasynyń baıaýlaýynan kórinedi.
«Qarjy naryqtary kóbinese naqty ekonomıkany kórsetedi. Qytaıdaǵy baıaýlaý álemdik ekonomıkanyń aýqymdy baıaýlaýyn bildiredi», - deıdi Bennett.
Sonymen birge, T.Bennet Qytaı ishindegi negizgi sektorlardaǵy qysymnyń artyp kele jatqanyn sebepterdiń biri retinde kórsetti. Naryqtyń quldyraýy – jumsaq aqsha-nesıe saıasatynan qatań saıasatqa jahandyq aýysýdyń nátıjesi. Japonııa ondaǵan jyldar boıy tómen paıyzdyq mólsherlemelerdi saqtaǵannan keıin qazir aqsha-nesıe saıasatyn birtindep qataıtýǵa bet burýda.
T. Bennettiń aıtýynsha, bul bırjalardaǵy aýytqýlarǵa áser etýi múmkin, biraq bul Azııa qor naryqtaryndaǵy sońǵy quldyraýdyń negizgi draıveri emes.
Qarjy sarapshylary jaqyndaǵy quldyraý Azııanyń negizgi ekonomıkalaryndaǵy tereńirek qurylymdyq problemalardyń kórsetkishi bolýy múmkin ekenin aıtýda.
Eske sala ketsek, tamyz aıynda birqatar BAQ Azııanyń qor naryqtarynyń quldyraýy Eýropaǵa tarady dep jazǵan edi.
