Sarapshylar 2026 jyly eń suranysqa ıe mamandyqtardy atady
ASTANA. KAZINFORM — Sarapshylar 2026 jyly eńbek naryǵynda eń kóp suranysqa ıe bolatyn mamandyqtardy anyqtady. Eń ózekti salalardyń qatarynda IT jáne jumysshy mamandyqtar aldyńǵy orynda tur, dep jazdy 24 kg.
Bıylǵy jyly eńbek naryǵynda tsıfrlyq mamandar men qoldanbaly kásip ıelerine degen joǵary suranys qatar saqtalatyny atap ótildi. Jumys berýshiler kásibı daǵdylardy beıimdelgishtikpen jáne zamanaýı tehnologııalarmen jumys isteı alý qabiletimen ushtastyra biletin qyzmetkerlerdi kóbirek izdeı bastady.
hh.ru derekterine sáıkes, 2026 jyly eń suranysqa ıe mamandyqtar qatarynda baǵdarlamalyq qamtamasyz etý ázirleýshileri, kıberqaýipsizdik jáne derektermen jumys isteıtin mamandar, sondaı-aq jumysshy jáne jappaı kásip ıeleri bolady.
Sarapshylardyń baǵalaýynsha, barlyq sala úshin basty úrdis — tsıfrlyq daǵdylardy (onyń ishinde jasandy ıntellektpen, baǵdarlamalyq jasaqtamamen, jabdyqtarmen jáne derektermen jumys isteý) synı oılaý men beıimdelgishtik sııaqty ıkemdi daǵdylarmen ushtastyra alatyn mamandarǵa degen qajettilik.
IT salasynda baǵdarlamalyq jasaqtama ázirleýshileri kósh bastap tur. Ásirese kúrdeli júıelerdi kommertsııalyq negizde ázirleý tájirıbesi bar fullstack jáne Java-ázirleýshiler joǵary suranysqa ıe. Kıberqaýipsizdik salasyndaǵy mamandarǵa degen suranys ta aıtarlyqtaı artty. Bul kıberqaýipterdiń kúsheıýimen jáne bıznestiń jappaı tsıfrlanýymen baılanysty. Sonymen qatar, derekterge súıene otyryp sheshim qabyldaýǵa kómektesetin data scientist mamandary, sondaı-aq jasandy ıntellekt pen mashınalyq oqytý ınjenerleri de ózektiligin saqtap otyr.
Sonymen qatar, biliktilik pen arnaıy ruqsattardy talap etetin jumysshy mamandyqtarǵa degen suranys joǵary deńgeıde qalyp otyr. Aldyńǵy qatarda slesarlar, mashınıster, dánekerleýshiler, montajshylar, avtoslesarlar men mehanıkter tur. Bul mamandyqtar boıynsha júzdegen myń bos jumys oryndary jarııalanǵan.
Budan bólek, kýrerler, júrgizýshiler, satýshylar, ákimshiler, ártúrli jumysshylar men tapsyrys jınaýshylar sııaqty jappaı mamandyqtar Reseı eńbek naryǵyndaǵy jalpy kadr suranysynyń shamamen jartysyn qurap otyr jáne sarapshylardyń pikirinshe, 2026 jyly da eń qajet mamandyqtardyń qatarynda qala beredi.
Memleket basshysy Qasym-Jomart Toqaev 2026 jyldy Tsıfrlandyrý jáne jasandy ıntellekt jyly dep jarııalady. 2025 jyly promt-ınjenerıng degen jańa mamandyq paıda boldy.
Al Almatyda bıyl qandaı mamandyqtarǵa suranys artqanyn myna siltemeden oqyńyz.