Sarapshy: Jasandy ıntellekt tálimgerlik ınstıtýtyn almastyra almaıdy
ASTANA. KAZINFORM – Jasandy ıntellekt qanshalyqty damyǵanymen, tálimgerlik ınstıtýtyn tolyq almastyra almaıdy. Bul týraly reseılik «Mashýk» bilim ortalyǵy janyndaǵy federaldyq ádistemelik ortalyqtyń jetekshisi Aleksandr Nızov málimdedi, dep habarlaıdy TASS.
Onyń aıtýynsha, jasandy ıntellektte tálimgerge tán mańyzdy qasıetter joq.
– Jasandy ıntellekt tiri tálimgerdi almastyra almaıdy. Sebebi onda empatııa, ómirlik tájirıbe jáne biregeı praktıkalyq bilim joq. JI paıdaly quralǵa aınalýy múmkin, biraq tálimger men tálim alýshy arasyndaǵy tikeleı qarym-qatynastyń ornyn eshqashan basa almaıdy, – dedi Aleksandr Nızov.
Sarapshy qazirgi jastardyń táýlik boıy qoljetimdi bolǵandyqtan chat-bottarmen sóılesýdi jıi tańdaıtynyn atap ótti.
Onyń pikirinshe, tálimgerlik mádenıetin damytý úshin psıhologııalyq kedergilerdi azaıtyp, urpaqtar arasyndaǵy tikeleı qarym-qatynasty kúsheıtý qajet.
– Qazir kóp jaǵdaıda qońyraý shalǵannan góri habarlama jazǵan yńǵaılyraq kórinedi. Keıde jumys ýaqytynan tys kezde tálimgerdi mazalaýǵa da yńǵaısyzdanamyz. Sondyqtan tálimgerlik júıesin ári tálimger, ári tálim alýshy tarapynan keńinen engizý úshin osy kedergilerdi azaıtý mańyzdy, – dedi ol.
Aleksandr Nızov 2026 jyldyń kókteminde «Mashýk» bilim ortalyǵy júrgizgen zertteý nátıjelerin de tanystyrdy.
Saýalnamaǵa qatysqandardyń 77,9 paıyzy jasandy ıntellektiniń tiri tálimgerdi almastyra almaıtynyn aıtqan. Respondentterdiń pikirinshe, tálimgerlik eń aldymen empatııaǵa, jeke úlgige jáne adam arasyndaǵy senimge negizdeledi.
Al qatysýshylardyń 21,3 paıyzy JI men adamnyń birlesken jumysyn qoldaıdy. Olardyń kózqarasy boıynsha jasandy ıntellekt kómekshi qyzmet atqaryp, al adam kommýnıkatsııa men qoldaý máselesine jaýap berýi tıis.
Saýalnamaǵa qatysqandardyń 1 paıyzǵa jetpeıtin bóligi ǵana jasandy ıntellektti tiri tálimgerdiń tolyqqandy balamasy retinde qarastyratynyn aıtqan.
Aıta keteıik, OpenAI Qazaqstannyń bilim júıesine jasandy ıntellekt engizýge atsalysady.
