Sarapshy jańa Konstıtýtsııany iske asyrý kezeńderin atady
ASTANA. KAZINFORM – Qazaqstandaǵy referendým qorytyndylary men jańa Konstıtýtsııany iske asyrýdyń aldaǵy qadamdary «Jibek Joly» telearnasyndaǵy «Taldaý» baǵdarlamasynda saıasattanýshy Ǵazız Ábishevtiń qatysýymen talqylandy.
Saıasattanýshy jańartylǵan konstıtýtsııalyq júıeni kezeń-kezeńimen engizý máselesine toqtaldy. Onyń aıtýynsha, jańa Negizgi zań birden kúshine enbeıdi.
– Konstıtýtsııa birden qoldanysqa engizilmeıdi. Qujattyń ótpeli erejelerine sáıkes, jańa Negizgi zań 2026 jyldyń 1 shildesinen bastap kúshine enedi. Osy ýaqytqa deıin qoldanystaǵy Parlament aýqymdy zań shyǵarý jumysyn júrgizip, birqatar mańyzdy zańdardy qabyldaýy tıis, - dedi ol.
Osyǵan baılanysty «Saılaý týraly» Konstıtýtsııalyq zańdy qaıta qaraý josparlanyp otyr. Bul 30 maýsymnan bastap qazirgi Májilis pen Senattyń ókilettigi toqtatylýyna baılanysty.
– 30 maýsym – qazirgi Májilis pen Senattyń sońǵy jumys kúni. Osy kúni eki Palata da taratylyp, depýtattardyń ókilettigi toqtatylady, - dedi Ǵazız Ábishev.
Sarapshynyń aıtýynsha, budan keıin eki aı ishinde jańa bir palataly Parlament – Quryltaı saılaýy ótkizilýi tıis. Saılaý proportsıonaldy júıe boıynsha ótedi.
Sonymen qatar «Parlament týraly» jańartylǵan Konstıtýtsııalyq zań qabyldanyp, onda Quryltaıdyń qurylymy men jumys tártibi aıqyndalady. Budan bólek, «Prezıdent týraly» zańǵa da ózgerister engiziledi.
– Quryltaıdyń qalaı jumys isteıtini jáne onyń reglamenti qandaı bolatyny jańa zańda naqty kórsetilýi tıis, - dep atap ótti sarapshy.
Onyń pikirinshe, jańa Konstıtýtsııa normalaryn tolyq iske asyrý úshin qoldanystaǵy zańnamaǵa da ózgerister engizý qajet.
– Jańa Konstıtýtsııany júzege asyrý úshin basqa da zańdarǵa kóptegen túzetý engiziledi, - dep túıindedi ol.
Eske salaıyq, 17 naýryzda Memleket basshysy Qasym-Jomart Toqaev Qazaqstan Respýblıkasynyń Konstıtýtsııasyna jáne «2026 jylǵy 15 naýryzda qabyldanǵan Qazaqstan Respýblıkasynyń Konstıtýtsııasyn iske asyrý jónindegi sharalar týraly» Jarlyqqa qol qoıdy.
Aıta keteıik, endi Konstıtýtsııa kúni jyl saıyn 15 naýryzda memlekettik mereke retinde jalpyulttyq deńgeıde atap ótiledi.