Sarapshy: Jańa Konstıtýtsııa jobasynda adamnyń qoǵam men memleket damýyndaǵy orny aıqyn
ASTANA. KAZINFORM – Preambýladan bastap qujat mátininde tolyqtaı negizgi orynda – adam jáne adam quqyqtary. Bul jóninde MNU professory, PhD Marat Ahmadı «Konstıtýtsııalyq reforma jáne qoǵamdyq dıalog: keleshekke baǵdar» atty sarapshylar alańynda málimdedi.
– Preambýlada adam quqyqtary men bostandyqtary múltiksiz saqtalatyny jazylǵan. Sonymen qatar mádenıet, bilim, ǵylym, ınnovatsııany damytý qoǵam damýynyń negizgi qundylyǵy retinde belgilengen. Bul jańa Konstıtýtsııa jobasynyń tek qana quqyqtyq qujat emes, sonymen birge eldiń uzaq merzimdi damý baǵdaryn aıqyndaǵan strategııalyq qundylyqtar júıesi ekenin kórsetedi, – dedi sarapshy.
Sondaı-aq ol atalǵan qaǵıdalar jańa Ata zań jobasynyń negizgi baptarynda da qamtylǵanyn atap ótti.
– Mysaly, 1-bapta «Memlekettiń eń joǵary qundylyǵy – adam men onyń ómiri, quqyqtary men bostandyqtary» delingen. Sonymen qatar jańa redaktsııada adam quqyqtarynyń qorǵalyp qana qoımaı, múltiksiz saqtalatynyna kepildik beriletini jazylǵan. Bul memlekettiń adam quqyqtaryn qorǵaýǵa erekshe jaýapkershilikpen qaraıtynyn bildiretin naqty quqyqtyq ustanym, – dedi M.Ahmadı.
Onyń sózinshe, 3-baptyń, 2-tarmaǵy, ıaǵnı «Qazaqstan Respýblıkasy adam kapıtalyn, bilimdi, ǵylymdy, ınnovatsııany damytýdy memleket qyzmetiniń strategııalyq baǵyty dep tanıdy» degen joldar da joǵarydaǵy tujyrymdy naqtylaıdy.
– Bul norma memleket damýynyń jańa paradıgmasyn aıqyn kórsetedi. Eldiń bolashaǵy tabıǵı resýrstarmen emes, eń aldymen, azamattardyń bilim deńgeıi, ıntellektýaldyq áleýeti, shyǵarmashylyq múmkindikterimen ólshenedi degen sóz. Memlekettiń damýyndaǵy negizgi faktor retinde adamı kapıtal qarastyrylǵan, – dedi ol.
Aıta keteıik, buǵan deıin jańa Konstıtýtsııa jobasynyń ózegi adam jáne adam quqyqtary ekenin jazǵanbyz.
