Sarapshy: teledebattar bıylǵy saılaý naýqanyndaǵy saıası partııalar úshin basty synaqqa aınalady
ASTANA. KAZINFORM – Saılaý naýqanynyń alǵashqy kúnderi saıası partııalardyń dástúrli úgit-nasıhatpen ǵana shektelmeı, ashyq saıası básekege de basymdyq bergenin kórsetti. Ózderiniń saılaýaldy baǵdarlamalaryn tanystyrýmen qatar, olar memlekettik kún tártibindegi ózekti máseleler boıynsha jarııa pikirtalasqa belsendi túrde aralasty. Bul týraly «SAILAÝ-2026: medıa jáne tsıfrlyq platformalar» sarapshylar alańynda «Qoǵamdyq kelisim» RMM basqarma basshysy Eldos Jumaǵulov málimdedi.
Sarapshynyń aıtýynsha, naýqannyń alǵashqy kezeńinen-aq qoǵam nazarynda bıznes múddeleriniń ókildigi, salyq saıasaty, aýyldyq aýmaqtardy damytý jáne ekologııalyq kún tártibi máseleleri boldy. Bul qazirgi saılaý naýqanynyń aldyńǵy saılaýlarmen salystyrǵanda mazmundy saıası básekeniń anaǵurlym joǵary deńgeıimen erekshelenetinin kórsetedi.
Eldos Jumaǵulovtyń aıtýynsha, saıası báseke birden birneshe deńgeıde órbip jatyr. Qatysýshylar bir-biriniń kásibı quzyreti men saıası tájirıbesine qatysty pikirtalas júrgizip jatqan partııaaralyq polemıkamen qatar, partııaishilik úderister de saılaý naýqanynyń barysyna eleýli yqpal etýde.
-Mundaı jaǵdaıda teledebattardyń mańyzy erekshe artady. Dál sol jerde partııalardyń ózara synnan mazmundy baǵdarlamalyq talqylaýǵa kóshe alatyny jáne saılaýshylarǵa senimdi balama usyna alatyny aıqyndalady. Kóp jaǵdaıda búkil saılaý naýqanynyń qalaı qabyldanatyny osy pikirtalastardyń sapasyna baılanysty bolady, – dep atap ótti Eldos Jumaǵulov.
Sarapshynyń pikirinshe, ashyq saıası básekeniń kúsheıýi azamattardyń sanaly tańdaý jasaýyna yqpal etip, saıası partııalardyń saılaýaldy baǵdarlamalarynyń sapasyna, dálelderiniń negizdiligine jáne jarııa kommýnıkatsııasynyń deńgeıine qoıylatyn talaptardy arttyrady.
Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýty uıymdastyrǵan sarapshylar alańy tsıfrlyq dáýirdegi saıası kommýnıkatsııanyń transformatsııasy, saılaýaldy úgit-nasıhatta jasandy ıntellektini paıdalaný, jalǵan aqparatqa qarsy is-qımyl, sondaı-aq elektoraldyq minez-qulyqtyń zamanaýı úrdisteri men saıası partııalarǵa qatysty qoǵamdyq kútýler máselelerine arnaldy.
Osyǵan deıin saılaý naýqanynda partııalar arasyndaǵy pikirtalas kúsheıgeni týraly jazdyq.
