Sarapshy: «Taza Qazaqstan» — tazalyq qana emes, jańa mádenıet qalyptastyrý bastamasy
ASTANA. KAZINFORM — «Taza Qazaqstan» — jaı ǵana tazalyq naýqany emes, qoǵamda jaýapkershilik pen qorshaǵan ortaǵa janashyrlyq mádenıetin qalyptastyratyn bastama. Bul týraly Qazaqstannyń ekologııalyq uıymdary qaýymdastyǵynyń basqarma tóraǵasy Aıgúl Soloveva aıtty.
Onyń sózinshe, «Taza Qazaqstan» bastamasyn tek ekologııalyq turǵydan emes, fılosofııalyq ári dúnıetanymdyq turǵydan da qarastyrý qajet.
— Memleket basshysy qoǵamda qarapaıym ádetterden bastap, eldi mekenderdi abattandyrýǵa jáne ár azamattyń jeke jaýapkershiligine deıingi ortaq mádenıetti qalyptastyrýdy kózdedi. Endigi mindet — osy baǵyttardyń bárin bir arnaǵa toǵystyryp, júıeli túrde júzege asyrý, — deıdi sarapshy.
Aıgúl Soloveva jańa qoǵamdyq keńistikterdi qurýmen qatar, olardyń tazalyǵy men saqtalýyna degen jaýapkershilikti de arttyrý kerek ekenin atap ótti.
— Zamanaýı qalalyq óner men vandalızmniń arajigin naqty ajyratyp, uǵymdardy durys júıeleý qajet. Sondaı-aq qoǵamdyq uıymdardy bul iske belsendi tartqan jón. Búginde bastamalardy talqylap, olardy qoldaýdyń naqty tetikterin ázirleýge múmkindik beretin túrli qoǵamdyq alańdar bar, — deıdi Aıgúl Soloveva.
Sarapshy atqarylǵan jumystardy qala turǵyndarynyń pikiri, qalaýy jáne zamanaýı úrdisterdi eskere otyryp baǵalaýdy usyndy.
Aıgúl Solovevanyń aıtýynsha, «Taza Qazaqstan» bastamasyn turaqty dástúrge aınaldyrý úshin balabaqsha búldirshinderinen bastap, aǵa býynǵa deıin barlyq jastaǵy azamattardy qamtý mańyzdy.
— Erekshe ıdeıalar usynyp, kórikti qalalar salýǵa, qoǵamdyq keńistikter men ortalyqtar qurýǵa bolady. Alaıda olardy mádenıetpen, mán-maǵynamen, durys ádettermen jáne azamattar men memlekettik organdardyń jaýapkershiligimen ushtastyrmasaq, turaqty nátıjege jetý qıyn, — dep qorytyndylady ol.
Eske sala keteıik, buǵan deıin Qasym-Jomart Toqaev «Taza Qazaqstan» bastamasyn jańa mazmunmen, tyń ıdeıalarmen jáne kreatıvti jobalarmen tolyqtyrýdy tapsyrǵan edi. Prezıdent qazaqstandyqtardy qalalar men aýyldardy abattandyrý isine belsendi atsalysýǵa shaqyrdy.
19 qyrkúıekte Qasym-Jomart Toqaev «Taza Qazaqstan» respýblıkalyq ekologııalyq aktsııasyna qatysty. Memleket basshysy Astanadaǵy Prezıdent saıabaǵynda aǵash ekti.
Qazaqstanda tazalyqtyń ulttyq standarty bolatyny jáne onyń bes negizgi baǵyty týraly tolyǵyraq osy jerden oqyńyz.
