Sarapshy: Saılaý naýqanynda partııalar arasyndaǵy pikirtalas kúsheıdi
ASTANA. KAZINFORM — Bıylǵy saılaý naýqanynda saıası partııalar arasyndaǵy pikirtalas jandana tústi. Bul týraly saıasattanýshy Talǵat Qalıev Qazaqstan Respýblıkasy Prezıdenti janyndaǵy Qazaqstannyń strategııalyq zertteýler ınstıtýty uıymdastyrǵan «SAILAÝ-2026: medıa jáne tsıfrlyq platformalar» sarapshylar alańynda aıtty.
Sarapshynyń sózinshe, qazirgi saılaý naýqany aldyńǵy elektoraldyq kezeńderden ózgeshe ótip jatyr. Eger buryn negizgi nazar óńirlerdegi saılaýshylarmen jáne tsıfrlyq aqparattyq keńistiktegi úgit-nasıhatqa aýdarylsa, qazir partııalar arasyndaǵy pikirtalasqa da kóbirek mán berile bastaǵan.
— Úgit-nasıhattyń alǵashqy kúnderiniń ózinde saıası kúshter arasynda pikirtalas bastaldy. Onda parlament jumysynyń tıimdiligi, kásipkerlerdiń múddesin qorǵaý jáne bıznestiń saıasattaǵy róli talqylandy, — dedi Talǵat Qalıev.
Onyń pikirinshe, bul saıası básekeniń kúsheıip kele jatqanyn kórsetedi.
— Partııalar óz baǵdarlamalaryn usynyp qana qoımaı, qoǵam damýynyń ózekti máseleleri boıynsha ustanymdaryn ashyq qorǵaýǵa daıyn ekenin baıqatyp otyr, — dedi saıasattanýshy.
Eske salaıyq, búgin Qazaqstannyń strategııalyq zertteýler ınstıtýty (QSZI) alańynda saılaýaldy naýqandaǵy jasandy ıntellektiniń róli, tsıfrlyq tehnologııalardyń yqpaly jáne feık aqparatpen kúres máseleleri talqylanyp jatyr.
