Nelikten satý menedjerine suranys kóbeıgen
ASTANA. KAZINFORM — Jumys izdeý protsesi tolyqtaı tsıfrlandyrylǵan saıyn onlaın alaıaqtyq táýekeli artyp, kúrdelene túsken. Osyǵan baılanysty HeadHunter Ortalyq Azııa kompanııasynyń marketıng jáne PR menedjeri Muhamed Baǵdatuly Jibek Joly telearnasynyń «Búgin Live» baǵdarlamasynda eńbek naryǵyndaǵy qaýipsizdik máselelerine toqtaldy.
Onyń aıtýynsha, kompanııa Qazaqstan naryǵynda 20 jyldan beri jumys isteıdi jáne osy ýaqyt ishinde mıllıondaǵan adamǵa jumys tabýǵa kómektesken. Qazirgi tańda platformada túıindeme bazasy 7 mıllıonǵa jýyq bolsa, bir kúnniń ózinde orta eseppen 47 myń bos jumys orny jarııalanady. Bul eńbek naryǵynyń tolyqtaı tsıfrlyq formatqa kóshkenin jáne jumys usynystarynyń kólemi joǵary ekenin kórsetedi.
Sonymen qatar spıker tsıfrlandyrý jaǵdaıynda eńbek naryǵyndaǵy qaýipsizdik tek platformanyń baqylaýymen shektelmeıtinin atap ótti.
— Máselen, jelide satý menedjeri dep shaqyrǵandardyń artynda «pıramıdalar» turýy múmkin. Sondyqtan rekrýterden mekemeniń zańdy qujatyn, saıtyn suraý kerek. Kompanııa zańdy túrde tirkelý kerek. Bul jerde tsıfrlyq saýattylyqtyń mańyzy zor, — dedi Muhamed Baǵdatuly.
Osyǵan baılanysty platformada jarııalanatyn árbir vakansııa men kompanııa aldyn ala qatań tekseristen ótedi. Bul qadam jalǵan habarlandyrýlardyń aldyn alyp, paıdalanýshylardyń qaýipsizdigin qamtamasyz etýge baǵyttalǵan.
— Mysaly, bizge jumys jaıly habarlandyrý bergisi kelse, tolyqtaı kompanııany, qujattaryn, derekterin tekseremiz. Ol kompanııanyń prıntsıpterine saı kelý kerek, qatań monıtorıngten ótedi. Paıdalanýshylarmen keri baılanys ta bar. Barlyq ýájderin qaraımyz, — dedi spıker.
Sonymen qatar eńbek naryǵyndaǵy jańa úrdister men ózgerister de nazardan tys qalmaıdy. Qazirgi tańda tsıfrlyq dáýirmen birge jumys formaty men HR salasyndaǵy talaptar jańaryp keledi.
— Jyl saıyn HR brend konferentsııasy ótedi. Saıysqa qatysqan, jumys usynýshy kompanııalardyń ishinen HeadHunter jeńimpazdy tańdap alady. Qazir zýmerlerdiń dáýiri. Gıbrıdtik jumys trendte. Osyndaı erekshelikter kompanııada kóp bolsa, biz arnaıy nomınatsııa beremiz, — dedi ol.
Eske salaıyq, elimizde óńirlerge serpin beretin kadrlyq baǵdarlama iske qosyldy.
