Sarapshy Prezıdent Joldaýy týraly: Otandyq bızneske turaqty «oıyn erejesi» kerek
ASTANA. QAZAQPARAT — Memleket basshysynyń bıylǵy Joldaýynda bızneske túsetin ákimshilik-salyqtyq júkteme, óndiristi uzaq merzimmen qarjylandyrý jáne otandyq kásiporyndardyń iri jobalarǵa qatysýy sııaqty máselelerge erekshe nazar aýdaryldy.
Ónerkásip saıasaty jáne ımportty almastyrý jónindegi sarapshy Indıra Nurlannyń pikirinshe, bul baǵyttardaǵy nátıjege qol jetkizý úshin kásipkerlerge boljamdy ári turaqty «oıyn erejesi» qajet.
— Kásipkerlerge jaǵdaıdyń turaqty bolǵany mańyzdy. Prezıdent salyq zańnamasyndaǵy bızneske artyq júkteme týdyratyn normalardy túzetý qajettigin atap ótti. Kásiporyndar jabdyq satyp alý, óndiristi keńeıtý nemese qyzmetkerlerdi jaldaý sııaqty sheshimderdi aldyn ala josparlaıdy. Sondyqtan erejelerdiń boljamdy bolýynyń máni zor, — dedi Indıra Nurlan.
Sarapshynyń aıtýynsha, óndiristik jobalardyń nátıjesi birden kórinbeıdi: jańa qýattardy iske qosýǵa jáne salynǵan qarajattyń qaıtarymyn alýǵa ýaqyt qajet. Osy sebepti uzaqmerzimdi qarjylandyrýǵa qoljetimdilik pen bankterdiń naqty sektordy kredıtteýi ónerkásiptiń damýyna yqpal etetin mańyzdy faktorlardyń biri.
— Óndiris jobalary iske qosylyp, ózin-ózi aqtaý úshin ýaqyt kerek. Qarjylandyrý sharttary osy erekshelikti eskerýge tıis, — deıdi ol.
Indıra Nurlan iri kompanııalardyń satyp alý konkýrstaryna otandyq óndirýshilerdiń qatysý múmkindigin keńeıtý jergilikti kásiporyndarǵa tapsyrystaryn josparlap, óndiris júktemesin turaqtandyrýǵa jáne naryqtaǵy ornyn nyǵaıtýǵa jol ashatynyn aıtady.
Sarapshy jańa zaýyt salý týraly sheshim qabyldanar aldynda ishki naryqtaǵy qajettilik pen eksporttyq múmkindikterdi taldaý kerektigin aıtty.
— Jańa zaýyttardyń ónimderi suranysqa ıe bola ma degen suraqqa naqty jaýap qajet. Suranys, naryq jáne eksport múmkindikteri qurylys bastalǵanǵa deıin baǵalaný kerek. Kásiporynnyń ómirsheńdigi osyǵan baılanysty, — dedi ol.
Sarapshy Joldaýda sóz bolǵan ınfraqurylymdy jańartý bastamasy da otandyq kompanııalarǵa qosymsha múmkindik ashatynyn aıtyp otyr. Mundaı jobalar materıaldar men jabdyqtarǵa, qyzmetterge suranys týdyryp, jergilikti kásiporyndardyń óndiristik tizbekterge qosylýyna jol ashady.
Joldaýda kórinis tapqan tsıfrlandyrý máselesine toqtalǵan Indıra Nurlan onyń tıimdiligin engizilgen tehnologııalardyń sanymen ǵana emes, óndiris nátıjesimen baǵalaý kerek dep sanaıdy.
Onyń aıtýynsha, tsıfrlyq sheshimder kásiporyn jumysynyń úzdiksizdigin qamtamasyz etip, shyǵyndy azaıtýǵa jáne ónim sapasyn arttyrýǵa yqpal etý kerek.
Sarapshynyń pikirinshe, Joldaýda aıtylǵan bastamalardyń naqty nátıjesi olardyń oryndalý barysyna baılanysty bolmaq.
