Sarapshy: partııalar aralyq debattar qazirgi saılaý naýqanynyń basty elementine aınalýy múmkin
ASTANA. KAZINFORM – Qazirgi saılaý naýqany aldyńǵylardan partııalar arasyndaǵy jarııa básekeniń qarqyndylyǵymen erekshelenedi. Saılaýshylarmen kezdesý, óńirlerge saparlar, BAQ-taǵy belsendilik sııaqty dástúrli úgit-nasıhat jumystarymen qatar, saıası partııalar bir-birimen ashyq pikirtalasqa jıirek túsýde.
Bul týraly «SAILAÝ-2026: medıa jáne tsıfrlyq platformalar» sarapshylar alańynda Qazaqstandyq qoǵamdyq damý ınstıtýty basqarma tóraǵasynyń orynbasary Azamat Baıǵalıev málimdedi.
Sarapshynyń aıtýynsha, búginde partııaaralyq pikirtalastyń ortalyǵynda bıznes múddelerin bildirý, lobbızm, salyq saıasaty jáne zań shyǵarý bastamalarynyń sapasy máseleleri tur. Bul naýqannyń negizinen ımıdjdik sıpattan mazmundy saıası talqylaýǵa birtindep aýysyp bara jatqanyn kórsetedi.
Azamat Baıǵalıev saılaý naýqany qatysýshylary arasynda belgili bir saralaný baıqala bastaǵanyn atap ótti. Keıbir partııalar tanymaldyǵy men parlamenttik tájirıbesi arqasynda óz pozıtsııalaryn nyǵaıtýǵa tyryssa, basqalary bastapqy múmkindikteriniń shekteýliligin jarııa belsendilikti arttyrý jáne neǵurlym qatań saıası rıtorıka arqyly toltyrýda.
-Eger bul úrdis jalǵasa berse, dál partııaaralyq debattar serııasy qazirgi naýqannyń basty elementteriniń birine aınalýy múmkin. Mundaı pikirtalastar qatysýshylardyń syn turǵysynan pikir aıtý qabiletin ǵana emes, qoǵamdyq kún tártibindegi eń ózekti máseleler boıynsha naqty, iske asyrylatyn sheshimder usyna bilý qabiletin de baǵalaýǵa múmkindik beredi, – dep atap ótti Azamat Baıǵalıev.
Sarapshynyń pikirinshe, mazmundy saıası básekeniń kúsheıýi qoǵamdyq dıalog sapasyn arttyryp, saılaýshylarǵa saıası partııalardyń baǵdarlamalary men usynystaryn taldaý negizinde sanaly tańdaý jasaýǵa kóbirek múmkindik beredi.
Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýty uıymdastyrǵan sarapshylar alańy saıası kommýnıkatsııanyń tsıfrlyq dáýirdegi transformatsııasy, saılaý aldy úgit-nasıhatta jasandy ıntellektti qoldaný, dezaqparatqa qarsy is-qımyl, sondaı-aq elektoraldyq minez-qulyqtyń zamanaýı úrdisteri men qoǵamnyń saıası partııalardan kútetin úmitteri máselelerine arnaldy.
Osyǵan deıin daýys berýshilerdiń tórtten úshi Quryltaı depýtattarynyń saılaýyna qatysýǵa daıyn ekeni týraly jazdyq.
