«Naýryz» baǵdarlamasy: 35 jasqa deıingi úmitkerlerge qosymsha upaı beriledi
ASTANA. KAZINFORM – Búginnen bastap «Otbasy bank» saıtynda «Naýryz» jáne «Naýryz jumysker» baǵdarlamalary boıynsha ótinim qabyldaý bastaldy. Basty shart – sońǵy bes jylda ótinim berýshiniń jáne onyń otbasy músheleriniń atyna turǵyn úı tirkelmegen bolýy tıis.
Ipoteka sarapshysy Jadyra Satymbekovanyń aıtýynsha, jańa úılerdi tańdaǵan jaǵdaıda bastapqy jarna kólemi keminde 10%, al ekinshi naryqtaǵy páter úshin 20%-dan bastalady.
– Baǵdarlamalar boıynsha «Baspana market» portalyndaǵy úıler tańdalýy múmkin. «Otbasy bankinde» depozıt bolsa, úmitker «Naýryz» baǵdarlamasyna qatysa alady. Ótinim berý onlaın, ETsQ arqyly. Úmitkerlerdi upaı boıynsha irikteıdi. Depozıttiń jylyna baılanysty ball qosylady, 35 jasqa deıingi úmitkerlerge nemese balalary barlarǵa qosymsha upaı beriledi. Іrikteý qorytyndysy 3 kún ishinde jarııalanady, – deıdi sarapshy Jibek Joly telearnasynyń «Búgin LIVE» baǵdarlamasyna bergen suhbatynda.
Al «Naýryz jumysker» baǵdarlamasyna qatysýshylar konkýrssyz ótinim bere alady.
– Jumysshy mamandyqtary boıynsha eńbek etetin azamattar jumys ornynan anyqtama ákelip ótinish bere alady. Áleýmettik osal topqa jatqandar 7%-ben, standartty klıentter 9%-ben ıpoteka alady. Talapqa saı kelmeıtin qatysýshylardy júıe avtomatty túrde ótkizbeıdi. Sondaı-aq, bank ótinim berýshiniń tólem qabiletin tekseredi. Konkýrstan ótken azamattarǵa úıdi tańdap, nesıe rásimdeýge 6 aı beriledi. Jalpy baǵdarlama 7 jylǵa arnalǵan, – deıdi Jadyra Satymbekova.
Sarapshy atap ótkendeı, «Otbasy bank» arqyly usynylǵan jeńildetilgen ıpoteka sharalary azamattarǵa baspanaǵa qoljetimdilikti arttyrýda, ásirese áskerı qyzmetkerler men áıelder úshin mańyzdy múmkindikter usynylyp jatyr.
– Úkimettiń sheshimimen jeńildetilgen ıpoteka kólemi 500 mlrd teńgege deıin ulǵaıtyldy. Osy sharalar arqyly «Áskerı baspana» baǵdarlamasy qaıta iske qosylyp, jyl saıyn 7 myńǵa jýyq áskerı qyzmetkerdiń otbasy qaıtalama naryqtan páter satyp alý múmkindigine ıe boldy. Sonymen qatar áıelderge arnalǵan «Umaı baǵdarlamasy» boıynsha alǵashqy jáne ekinshi naryqtaǵy úılerdi eldiń kez kelgen óńirinen alý múmkindik bar. Negizgi shart – alǵashqy jarnany 20%-ǵa deıin «Otbasy bankte» depozıtke ornalastyrý. Konkýrstyq irikteý kezinde shottaǵy jınaqtalǵan qarajattyń kólemi mańyzdy ról atqarady, – deıdi sarapshy.
Aıta keteıik, jyl basynan beri «Otbasy bank» 60 myń adamǵa jalpy somasy 1,2 trln teńgege jýyq nesıe bergen. Baǵdarlama qaıta iske qosylǵannan keıin qansha baspana beriletini kelesi aptada belgili bolady.
Otbasy bank «Naýryz» baǵdarlamasy boıynsha kredıt berý úshin KASE-den 102,7 mlrd teńge tartty.