Sarapshy: Quryltaıdyń mıssııasy — partııalyq qundylyqtar men ulttyq múddelerdi úılestirý
ASTANA. KAZINFORM – Quryltaıdyń basty fýnktsııalarynyń biri partııalyq qundylyqtar men ulttyq múddelerdi úılestirý, sondaı-aq syndarly saıası dıalog alańyn qalyptastyrý bolýǵa tıis. Muny Almatyda ótken «Quryltaı–zań shyǵarýshy bıliktiń jańa arhıtektýrasynyń negizi» atty saraptamalyq alańynda Fılosofııa, saıasattaný jáne dintaný ınstıtýtynyń dırektory Aıgúl Sádýaqasova málimdedi.
Sarapshynyń aıtýynsha, memlekettiń qazirgi damý kezeńi bılik ınstıtýttarynyń tıimdi jumysyn ǵana emes, sonymen qatar memleket, saıası partııalar, azamattyq qoǵam, sarapshylar qoǵamdastyǵy jáne óńirler arasyndaǵy úzdiksiz ózara is-qımyldy talap etedi. Quryltaı ártúrli saıası kózqarastar bir-birine qarsy turmaı, eldiń strategııalyq damýy jónindegi teńgerimdi sheshimderdi izdestirýdiń negizine aınalatyn keńistik bola alady.
Aıgúl Sádýaqasova atap ótkendeı, zań shyǵarýshy bıliktiń jańa modeli Quryltaıǵa alǵashqy saılaýdy daıyndaý kezeńinde aıryqsha mańyzǵa ıe bolyp otyr. Bul saılaý jaı ǵana kezekti naýqan emes, konstıtýtsııalyq reformany júzege asyrýdyń jáne eldiń jańa ókildi organyn qalyptastyrýdyń alǵashqy kezeńi bolmaq. Sarapshynyń pikirinshe, proportsıonaldy saılaý júıesine kóshý saıası partııalardyń rólin kúsheıtip, básekeniń salmaǵyn jeke tulǵalardan góri baǵdarlamalar, ıdeıalar men komandalar arasyndaǵy básekege aýystyrady.
Sarapshy saılaý merzimderiniń aldyn ala jarııalanǵanyn da atap ótti, bul barlyq partııaǵa daıyndyqtyń birdeı jaǵdaıyn qamtamasyz etti. Sonyń arqasynda saıası kúshter baǵdarlamalaryn jańartyp, partııalyq tizimderin qalyptastyryp, saılaýshylarmen mazmundy jumys júrgize aldy, bul óz kezeginde básekeles saıası ortanyń damýyna jáne saılaý protsesine degen senimniń nyǵaıýyna yqpal etedi.
Aıgúl Sádýaqasova saıası básekege qaramastan, barlyq saıası kúshterdi biriktiretin jalpyulttyq basymdyqtar bar ekenin atap ótti. Olarǵa memlekettiliktiń nyǵaıýy, qoǵamdyq kelisimniń qamtamasyz etilýi, mádenı biregeıliktiń saqtalýy, azamattardyń ómir súrý sapasynyń artýy jáne eldiń turaqty damýy jatady.
Sarapshynyń sózinshe, halyqtyń memlekettik bıliktiń jalǵyz qaınar kózi ekeni týraly konstıtýtsııalyq qaǵıda dál saılaý arqyly is júzinde kórinedi. Azamattar daýys berýge neǵurlym belsendi qatyssa, qoǵamdyq pikir soǵurlym tolyq kórinis tabady, al qalyptasqan Quryltaı qoǵam tarapynan zor qoldaý men senimge ıe bolady. Mundaı jaǵdaıda saıası báseke ǵana emes, saılaýdan keıin ártúrli partııalardyń jalpyulttyq maqsattarǵa birlesip jetý qabileti de erekshe mańyzǵa ıe bolady.
Aıgúl Sádýaqasovanyń pikirinshe, Quryltaıdyń mindeti saıası aıyrmashylyqtardy joqqa shyǵarý emes, ashyq dıalog, ózara qurmet pen ymyraǵa kelý úshin jaǵdaı jasaý bolyp tabylady. Ártúrli saıası kúshterdi memlekettiń strategııalyq múddeleri tóńireginde biriktire bilý qoǵamdyq senimdi nyǵaıtýǵa, azamattardyń memlekettik kún tártibin qalyptastyrýǵa keńirek qatysýyn qamtamasyz etýge jáne qabyldanatyn sheshimderdiń sapasyn arttyrýǵa múmkindik beredi.
Memlekettik organdardyń, jetekshi analıtıkalyq ortalyqtardyń, ǵylymı qoǵamdastyqtyń, joǵary oqý oryndarynyń, qoǵamdyq uıymdar men sarapshylar qoǵamdastyǵynyń ókilderin biriktirgen saraptamalyq alań Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýtynyń uıymdastyrýymen ótti.
