Sarapshy Qazaqstannyń syrtqy saıasatyndaǵy bıylǵy TOP-5 oqıǵany atady
Bıyl Qazaqstannyń syrtqy saıasat salasynda aýqymdy jumys atqaryldy. Ásirese qaýipsizdik, yntymaqtastyq jáne damý salalarynda jahandyq jáne óńirlik kún tártibin qalyptastyrý men iske asyrýda elimiz erekshe úles qosty. Halyqaralyq qatynastar jónindegi sarapshy Erik Batyrhanov Kazinform tilshisimen áńgimesinde Qazaqstannyń syrtqy saıasatyndaǵy bıylǵy TOP-5 basty oqıǵa jóninde pikir bildirdi.
Sarapshy eń aldymen Prezıdent Qasym-Jomart Toqaevtyń Qazaqstannyń 2020-2030 jyldarǵa arnalǵan syrtqy saıasat tujyrymdamasyn berik ustanatynyn aıtyp ótti.
Aıtýynsha, bul tujyrymdamada Qazaqstanǵa álemdik qaýymdastyqtyń jaýapty múshesi mártebesin bekitý, elimizdiń halyqaralyq bastamalaryn neǵurlym tıimdi jáne júıeli túrde ilgeriletýdi qamtamasyz etý qajettigi aıtylǵan.
«2023 jyly Qazaqstan Prezıdenti elimizdiń kópvektorly syrtqy saıasatyn pash etetin birqatar aıtýly sharaǵa belsene qatysty. Eń aldymen, Qasym-Jomart Toqaevtyń 2023 jylǵy 20 qyrkúıekte BUU Bas Assambleıasynyń 78-sessııasy aıasyndaǵy jalpy pikirsaıysta sóılegen sózin atap ótkim keledi. Prezıdent sózinde memleketterdiń qaýipsizdigi men aýmaqtyq tutastyǵy, bolashaqta aýyz sý tapshylyǵy, búkil álemge tónetin ıadrolyq qaýip jáne t.b kóptegen mańyzdy taqyryptar qozǵaldy», — deıdi Erik Batyrhanov.
Sarapshy ekinshi syrtqy saıası oqıǵa retinde amerıkalyq The Hill saıası basylymynda Prezıdent Qasym-Jomart Toqaevtyń «BUU qysqamerzimdi sheshimderge ǵana emes, júzjyldyqty anyqtaıtyn sheshimderge de nazar aýdarýy kerek» degen maqalasy jarııalanǵanyn atap ótti.
«Prezıdent maqalada halyqaralyq qoǵamdastyqty shara qabyldaýǵa shaqyrady. Bul rette ol saıası mansap pen búkil jahandyq problemalardy birlesip sheshýge naqty kózqaras pen tabandylyq qajettigin aıtty», — deıdi halyqaralyq qatynastar jónindegi sarapshy.
Úshinshi oqıǵa — el Prezıdentiniń Germanııaǵa sapary barysynda jasalǵan birqatar mańyzdy kelisim.
«Ózderińiz bilesizder, halyqaralyq saıasatta saparlar deńgeıi ártúrli bolady. Memleket basshysy Germanııaǵa resmı saparmen bardy. Osy jyldyń maýsym aıynda Germanııanyń federaldyq prezıdenti Frank-Valter Shtaınmaıer Qazaqstanǵa kelgen bolatyn. Al bizdiń prezıdentimiz Germanııa+Ortalyq Azııa sharasy qarsańynda jeke shaqyryldy. Bul kóp nárseni bildiredi», — dedi ol.
Sarapshy tórtinshi oqıǵa retinde Memleket basshysynyń Dýbaıdaǵy Dúnıejúzilik sammıtte sóılegen sózin atap ótip, oǵan tolyǵyraq toqtaldy.
«Memleket basshysy 2023 jylǵy 1 jeltoqsanda Dýbaıda ótken Dúnıejúzilik klımattyq sammıtte sóz sóıledi. Memleket basshysy Qazaqstannyń Parıj kelisimin ratıfıkatsııalaǵanyn jáne 2060 jylǵa deıingi kómirtekti beıtaraptyq strategııasyn qabyldaǵan aımaqtaǵy birinshi memleket bolǵanyn, Qazaqstannyń jel jáne kún energetıkasyn damytýda orasan zor áleýeti bar ekenin atap ótti. Sondaı-aq ol halyqaralyq qaýymdastyqty bir kezderi álemde tórtinshi kól bolǵan Araldy qutqarý halyqaralyq qoryn qoldaýǵa kóbirek qarajat bólýge shaqyrdy», — dedi Erik Batyrhanov.
Saıasattanýshynyń sózinshe, besinshi negizgi oqıǵa — Qasym-Jomart Toqaev pen Qytaı Halyq Respýblıkasynyń Tóraǵasy Sı Tszınpınniń úshinshi «Bir beldeý, bir jol» halyqaralyq yntymaqtastyq forýmy aıasynda júrgizgen kelissózi.
«Qytaı basshysy Qazaqstan Prezıdentin Beıjińdegi Halyq jınalysy zalynda qarsy aldy. Mártebeli meıman úshin Qurmetti qaraýyl rotasy jasaqtaldy. Bul taǵy da kezdesýdiń joǵary deńgeıin jáne QHR sııaqty qýatty eldegi Qazaqstan Prezıdentiniń bedelin kórsetedi», — dep tolyqtyrdy sarapshy.
Sondaı-aq, Erik Batyrhanov túrki memleketteriniń sammıtin erekshe atap ótti.
OlQazaqstannyń halyqaralyq ustanymyn nyǵaıtýǵa, túrli aımaqtarmen yntymaqtastyqty damytýǵa jáne jahandyq deńgeıde ulttyq múddeni ilgeriletýge baǵyttalǵan osy oqıǵalar men Prezıdent Toqaevtyń búkil is-áreketteri elimizdiń syrtqy saıasattaǵy kópvektorly kózqarasyn pash etkenin atap ótti.
