Sarapshy: Qazaqstan Shyǵys pen Batys arasyndaǵy mańyzdy baılanystyrýshy elge aınalyp keledi
ASTANA. KAZINFORM- Qazaqstan birtindep ashyqtyǵy, eseptiligi jáne básekelestigi joǵary saıası júıege qaraı bet alyp keledi. Berliner Zeitung basylymynyń geosaıasat bóliminiń basshysy Nıkolas Býtylınniń pikirinshe, bul — evolıýtsııalyq úderis.
Onyń aıtýynsha, qazirgi saıası úderisterdi Qazaqstannyń 10 jyl burynǵy jaǵdaıymen salystyra otyryp baǵalaý mańyzdy.
— Júıeniń anaǵurlym ashyq, esep beretin jáne básekeli bola túsetinin baqylaý qyzyqty bolady. Meniń oıymsha, bul evolıýtsııalyq úderis, — dedi Nıkolas Býtylın.
Sarapshy azamattardyń eldiń saıası ómirine belsendi qatysýyna da nazar aýdardy. Onyń pikirinshe, bolyp jatqan ózgerister Qazaqstannyń jańa saıası baǵyty qalyptasyp kele jatqanyn kórsetedi.
Býtylın Qazaqstannyń geosaıası ornalasýyna jáne onyń halyqaralyq qatynastardaǵy róline de erekshe toqtaldy.
— Qazaqstan ártúrli elder men múddeler arasyndaǵy ózindik bir kópirge aınalyp keledi, — dedi ol.
Sarapshynyń aıtýynsha, búginde Qazaqstanda Reseı, Ýkraına, Belarýs, AQSh, Eýropa, Qytaı, Ońtústik Koreıa, Túrkııa jáne basqa da elderdiń kompanııalary men ınvestorlary jumys isteıdi.
— Jýrnalıstik turǵydan alǵanda, bul óte erekshe jaǵdaı. Munda kóptegen elderdiń ókildigi bar jáne Qazaqstan olardyń ózara is-qımyl jasaýyna qolaıly alańǵa aınalyp keledi, — dedi Býtylın.
Ol munaı, gaz jáne ýrandy qosa alǵanda, tabıǵı resýrstardyń mol bolýy, sondaı-aq Qazaqstannyń iri ekonomıkalyq ortalyqtardyń arasynda ornalasýy eldiń sheteldik ınvestorlar úshin tartymdylyǵyn arttyrady. Bul Qazaqstan úshin óte mańyzdy ekenin atap ótti.
Buǵan deıin belgııalyq baıqaýshy Quryltaı saılaýy Ortalyq Azııa úshin mańyzdy kezeń ekenin aıtqan edi.
