Sarapshy: Birneshe páteri bar adamdar úshin jańa baspana alý qıyndaıdy

ASTANA. KAZINFORM — Qarjyger, baspana sarapshysy Batyrhan Elemes qazirgi ıpotekalyq jaǵdaı men turǵyn úı naryǵyndaǵy ózgeristerge qatysty pikir bildirdi.

Sarapshynyń aıtýynsha, eldegi ekonomıkalyq jáne qarjylyq sheshimder baspana baǵasyna tikeleı áser etip otyr.

— Qurylys kompanııalaryna jáne turǵyn úı baǵdarlamalaryna bólinetin qarjy kólemi eki esege artty. Bul óz kezeginde naryqtaǵy qozǵalysty jandandyrady. Meniń oıymsha, Astana, Almaty jáne Shymkent sııaqty iri qalalarda baǵa túspeıdi, tek turaqtalady. Al óńirlerde 10–15 paıyz shamasynda tómendeý bolýy múmkin, — deıdi Batyrhan Elemes Jibek Joly telearnasyndaǵy «Búgin LIVE» baǵdarlamasyna bergen suhbatynda.

Qarjygerdiń sózinshe, sońǵy aılarda Ulttyq banktiń paıyzdyq mólsherlemeni 18%-ǵa deıin kóterýi jáne ıpotekalyq nesıege qoıylǵan 20%-dyq shekteý bankterdiń naryqtaǵy belsendiligin tómendetti.

— Buǵan deıin mólsherleme 25% bolǵan edi, keıin 20%-ǵa túsirildi. Biraq basqa bankter úshin bul tıimsiz jaǵdaı. Sebebi olar Ulttyq bankten 18%-ben qarjy alyp, 20%-ben ıpoteka berý arqyly tabys kóre almaıdy. Sondyqtan qazir bankter ıpoteka usynýǵa asa qulyqty emes. Osydan keıin áleýmettik jelilerde turǵyndardyń narazylyǵy kúsheıip, «endi baspana ala almaımyz» degen pikirler kóbeıdi, — deıdi sarapshy.

Degenmen, Prezıdent pen Premer-Mınıstrdiń kezdesýi men tapsyrmalarynan keıin jaǵdaı birtindep turaqtala bastady. Úkimettiń jańa ekonomıkalyq reformalary aıasynda «7-20-25» baǵdarlamasy «7-30-35» formatyna aýysyp, ıpoteka merzimi 20 jyldan 30 jylǵa deıin uzartylmaq.

Sarapshynyń pikirinshe, jańa reformalar baspanasyz júrgen áleýmettik toptar úshin paıdaly bolmaq.

— Prezıdenttiń tapsyrmasynan keıin páter alý múmkindigi, ásirese áleýmettik sanattaǵy azamattar úshin saqtalyp qaldy. Qarjylandyrý kólemi de ulǵaıady. Biraq birneshe páteri bar adamdar úshin jańa baspana alý qıyndaıdy, óıtkeni naryqtyq ıpotekaǵa qoljetimdilik shekteledi. Qazir eń bastysy — jańa baǵdarlamalardyń iske qosylýyn kútý. Meniń oıymsha, bul sheshim durys baǵyttaǵy qadam, — deıdi qarjyger.

Aıta keteıik, budan buryn Prezıdent Bektenovke Úkimettiń ekonomıkalyq baǵdarlamasyn iske asyrýǵa qatysty tapsyrma berdi.

Artynsha Úkimet makroekonomıkalyq turaqtylyqty qamtamasyz etý jáne ekonomıkalyq reformalardyń teris saldaryn barynsha azaıtý baǵytynda sharalar qabyldady. Soǵan sáıkes, halyq úshin ıpotekalyq nesıe kólemi eki ese ulǵaıady, bul turǵyn úıge qoljetimdilikti qamtamasyz etýge múmkindik beredi.