Sarapshy: bıylǵy saılaý naýqany ashyq saıası básekeniń jańa kezeńine ótti
ASTANA. KAZINFORM – Bıylǵy saılaý naýqanynyń alǵashqy aptasy partııalar arasyndaǵy saıası básekeniń jańa deńgeıge kóterilgenin kórsetti. Eger buryn negizgi tartys teledebattar barysynda baıqalsa, bıyl ashyq saıası polemıka úgit-nasıhat naýqanynyń alǵashqy kúnderinen-aq bastaldy. Bul týraly «SAILAÝ-2026: medıa jáne tsıfrlyq platformalar» saraptamalyq alańynda saıasattanýshy Naıla Muhtarova málimdedi.
Sarapshynyń aıtýynsha, qazirgi saılaý naýqany dástúrli úgit-nasıhatpen ǵana shektelmeı, partııalardyń bir-biriniń saılaýaldy baǵdarlamalary men bastamalaryn ashyq talqylaýy arqyly erekshelenip otyr. Mundaı pikirtalastar saıası básekeniń sapalyq turǵydan jańa deńgeıge kóterilgenin kórsetedi.
Naıla Muhtarova saılaý naýqanynyń alǵashqy kúnderinen-aq baǵdarlamalyq máseleler boıynsha pikirtalastardyń bastalýy aldaǵy elektoraldyq naýqannyń mazmundy ári básekeli ótetininiń mańyzdy belgisi ekenin atap ótti.
-Búgingi teledebattar partııalardyń tek syn aıtý qabiletin ǵana emes, óz ustanymdaryn naqty dáleldermen qorǵaý deńgeıin de kórsetetin mańyzdy alańǵa aınalady. Bul óz kezeginde saılaýshylardyń saıası partııalarǵa degen senimin nyǵaıtyp, olardyń sanaly tańdaý jasaýyna yqpal etedi, – dedi saıasattanýshy.
Sarapshynyń pikirinshe, ashyq saıası polemıka men baǵdarlamalyq pikirtalastar demokratııalyq saıası mádenıettiń damýyna serpin beredi. Mundaı format partııalardyń qoǵammen ashyq dıalog ornatýyna jáne elektorattyń senimin arttyrýǵa múmkindik beredi.
Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýty uıymdastyrǵan saraptamalyq alańda tsıfrlyq dáýirdegi saıası kommýnıkatsııanyń transformatsııasy, saılaýaldy úgit-nasıhatta jasandy ıntellektini paıdalaný, jalǵan aqparatqa qarsy is-qımyl, sondaı-aq elektoraldyq minez-qulyqtyń zamanaýı úrdisteri men saıası partııalarǵa qatysty qoǵamdyq kútýler talqylandy.
Osyǵan deıin saıası partııalardyń ashyq ári jarııa básekege kóshe bastaǵany týraly jazdyq.
