Sarapshy: Áıgili saýndtrekterdiń kontsertteri Qazaqstandy halyqaralyq daýǵa dýshar etýi múmkin

ASTANA. KAZINFORM – «B. Qaldaıaqovanyń Shámshi álemi» qorynyń atqarýshy dırektory Botagóz Qaldaıaqova álemge áıgili saýndtrekterdiń kontsertin uıymdastyrýshylar Qazaqstandy halyqaralyq daýǵa dýshar etý múmkin ekenin aıtady.

«Biz qazir halyqaralyq daýdyń aldynda turmyz. Nege ekenin aıtaıyn ba? Óıtkeni «Ǵalamat ǵasyr: Súleımen sultan» serıalynyń saýndrekteri degen sııaqty kontsertter qaptap ketti ǵoı. Sony ótkizip júrgenderdiń eshqaısysy álem juldyzdaryna, oryndaýshylarǵa avtorlyq syıaqy tólep jatqan joq. Onyń bári «pırattyq kontent». Sheteldik avtorlar óz elinen bizge shaǵym túsirse, asa iri halyqaralyq daý bolady», - deıdi sarapshy.

Botagóz Qaldaıaqova bul máseleni bılet operatorlary arqyly sheshýge bolatynyn aıtty.

«Men qazaqstandyq avtorlardy aıtyp otyrǵan joqpyn. «Biz jaraıdy, ózimiz ǵoı» dep qoıa salamyz. Onyń sheshimi bar. Ticketon, «Kassır» sııaqty bılet operatorlaryn satylǵan bılet aınalymynan avtorlarǵa syıaqy aýdarýǵa mindetteý kerek. Zań boıynsha kontsert uıymdastyrýshylar bılet satýdan túsken aqshanyń 4 paıyzyn avtorlyq qoǵamdarǵa nemese tikeleı muragerlerge avtorlyq syıaqy retinde berýge mindetti. Án bolsa, 2 paıyzy saz avtoryna, 2 paıyzy mátin avtoryna beriledi. Ol tártipti eshkim saqtap jatqan joq. Óıtkeni eshkim muny teksere almaıdy», - dedi ol.