Sarapshy AQSh-tyń OA elderine bet burýyna qatysty: ulttyq múddesine tolyq sáıkes keledi

ASTANA. KAZINFORM – QR Prezıdenti janyndaǵy strategııalyq zertteýler ınstıtýtynyń sarapshysy, saıası ǵylymdarynyń kandıdaty Aınur Tuqymova Kazinform agenttiginiń YouTube arnasynda shyǵatyn «BIZDIÑ ORTA» podkastynda AQSh-tyń Ortalyq Azııa elderine qyzyǵýshylyǵynyń artýynyń negizgi sebepterin atap berdi.

- Tramptyń ózi aıtty ǵoı, AQSh úkimeti Ortalyq Azııaǵa negizsiz kóńil bólmeı keldi, osy aımaqqa jetkilikti deńgeıde kóńil bólmegeni AQSh úshin úlken qatelik boldy dep. Jaqynda Aýǵanstandaǵy Bagram áýe bazasyn qaıtarý kerek degendi aıtty, ıaǵnı osy aımaqqa qaraı kádimgideı kóńiliniń aýǵanyn baıqaýǵa bolady, - degen oıyn keltirdi Aınur Tuqymova podkast barysynda.

Sarapshynyń aıtýynsha, bul jerde qysqamerzimdi emes, uzaqmerzimdi maqsattar bar.

- Óıtkeni, Ortalyq Azııa boıynsha arnaıy ókil taǵaıyndaldy, delegatsııanyń onyń ishinde ınvestıtsııa boıynsha delegatsııanyń jıilegenin kórýimizge bolady. Bul – sıgnal, ıaǵnı AQSh-tyń osy aımaqqa degen qyzyǵýshylyǵy artyp keledi, aımaqtaǵy saıasatqa aralasady degen sóz. Bul aımaq Iranǵa da baılanysty, óte mańyzdy óńir, sondyqtan qaı jaǵynan alsaq ta AQSh-tyń barynsha Ortalyq Azııamen qatysýy, máselege aralasýy ulttyq múddesine tolyǵymen sáıkes keledi. Bolashaqta bizge de táýekelderdi seıiltý úshin, tek bir áripteske senbeı, barynsha ártaraptandyrý, áriptestikti ilgeriletý mańyzdy, - deıdi ol.

Odan bólek, spıker Qazaqstan AQSh-pen Ortalyq Azııa elderinde birinshi bolyp, 2008 jyly strategııalyq áriptes retinde qujatqa qol qoıǵanyn eske saldy.

- Kelesi másele, AQSh prezıdentiniń Ortalyq Azııanyń qaı eline birinshi bolyp keletini. Ol da kóp talqylanyp jatqan másele, kóremiz, áńgime qaı elge birinshi keletininde emes, Ortalyq Azııaǵa kelgende qanshalyqty naqty kelisimderge keletininde, - dep tolyqtyrdy saıası ǵylymdarynyń kandıdaty.

Osyǵan deıin saıasattanýshy Denıs Jılıaevtiń Armenııa premer-mınıstri Nıkol Pashınıannyń Qazaqstanǵa saparyna qatysty pikirin bergen edik.