Sarandaǵy jylý maýsymynda olqylyq jibergen jaýapty tulǵalar jazalandy

QARAǴANDY. KAZINFORM – Saran qalasynda jylýdyń ýaqtyly berilmeýine qatysty atalmysh qalanyń ákimi, Qaraǵandy oblysy ákiminiń orynbasary men energetıka basqarmasynyń basshysy jazalandy. Ol jaıynda apparattyq jınalys barysynda óńir basshysy málim etti, dep habarlaıdy Kazinform tilshisi.

Saran qalasynyń ákimi Erkin Baýlyqov pen Qaraǵandy oblysynyń energetıka jáne TKSh basqarmasynyń basshysy Tilektes Dosaev qatań sógis aldy. Oblys ákiminiń birinshi orynbasary Azamat Taıjanovqa eskertý túrinde tártiptik jaza jarııalandy.

Bul týraly oblys ákimi Ermaǵanbet Bólekpaev apparattyq keńeste málimdedi.

— Óziniń qyzmettik mindetterin tıisinshe oryndamaǵany úshin, atap aıtqanda, jylytý maýsymyna daıyndyqty jetkiliksiz túrde baqylaǵany úshin meniń birinshi orynbasaryma eskertý túrinde tártiptik jaza qoldanylsyn. Saran qalasynyń ákimi men energetıka jáne TKSh basqarmasynyń basshysyna qatań sógis jarııalansyn. Qys mezgilinde sapaly jylýmen qamtamasyz etý mindeti biz úshin basym ekenin taǵy da eske salǵym keledi. Jumys turaqty túrde júrgizilýi kerek! Ár jaǵdaı boıynsha qatań baǵa berilip, jaýapkershilik dárejesi anyqtalady, — dedi óńir basshysy.

Saran qalasynyń ákimi qaladaǵy jylý jaǵdaıy týraly baıandady. Onyń aıtýynsha, barlyq jergilikti qazandyqtar shtattyq rejımde jumys isteýde, otyn qory qamtamasyz etilgen. Keıbir úıler boıynsha qalalyq chatqa túsetin suraqtar jedel qaralady, dep sendirdi Erkin Baýlyqov.

Esterińizge sala keteıik, Saran qalasynda turǵyndar úılerde jylýdyń joqtyǵyna jappaı shaǵymdana bastaǵan. Qala ákimi Erkin Baýlyqov Instagram-daǵy paraqshasynda jaǵdaıdy túsindirip, turǵyndardan keshirim surady.

Saran qalasyndaǵy jylý jaǵdaıyna baılanysty Energetıka mınıstri bastaǵan komıssııa quryldy. Komıssııa quramyna energııa qadaǵalaý salasynyń jáne tıisti organdardyń ókilderi kirdi. Almasadam Sátqalıev Sarandaǵy qazandyqtyń iske qosylmaýynyń sebepterin atady.