Saranda jas dárigerlerge páter kiltteri tabys etildi
QARAǴANDY. QazAqparat - Saranda Medıtsına qyzmetkerleriniń kúni qarsańynda jas dárigerlerge páter kiltteri berildi. Saltanatty sharaǵa Qaraǵandy oblysynyń ákimi Erlan Qoshanov qatysty, dep habarlaıdy óńir basshysynyń resmı saıty.
Bes qabatty turǵyn úıdiń birinshi qabatynda ornalasqan burynǵy tis emhanasy jóndelip 11 páterge aınaldy. 8 bir bólmeli jáne 3 eki bólmeli. Olar jas dárigerlerge berildi.
- Búgin jaqsy kún, osynda turatyn, eńbek etetin jáne halyq densaýlyǵyn qorǵaıtyn jas dárigerlerge páter berip jatyrmyz. Men tizimdi qarap shyqtym: barlyq dárigerler elimizdiń túrli aımaqtarymyzdan kelgen eken, kóbisi otbasyn qurmaǵandar. Men sizder osy jerde jumystaryńyzdan lázzat alyp, jeke bastaryńyzdyń baqytyn tabatyndaryńyzǵa kúmánim joq,- dedi Erlan Qoshanov.
Oblys ákimi jańa qonystanýshylardy merekelerimen quttyqtap, olarǵa jemisti jumys pen mansap satysymen joǵary kóterilýlerin tiledi.
Jas dárigerlerge arnalǵan páterlerdi jóndeýge jergilikti jáne oblystyq bıýdjetten 52 mln teńge jumsalǵan. Tehnıka men jıhaz demeýshilerdiń qarajatyna satyp alyndy.
Páter úlgisindegi jataqhanada ár turǵyn úılerde as úı, jýynatyn bólme men kireberis, al turmystyq tehnıkadan - kir jýǵysh mashına, tońazytqysh, sý ysytqysh qurylǵylar, teledıdar jáne t.b. bar.
Páterler Saran qalasynyń Ortalyq aýrýhanasynyń qaraýynda. 
- Biz jubaıymyz ekeýimiz Qaraǵandyda, medıtsınalyq ýnıversıtette oqyp júrgende tanystyq. Men ózim Ekibastuzdyń týmasymyn, áıelim Petropavldiki. Meniń mamandyǵym hırýrg, ol - terapevt dáriger. Ótken jyly JOO támamdadyq ta úılendik. Ýnıversıtette júrgenimizde bos jumys oryndary jármeńkesi ótken bolatyn, sol kezde bizge Saran qalasynyń Ortalyq aýrýhanasynda jumys usyndy, shart boıynsha jumysqa ornalassaq páter beremiz dedi. Biz kelistik. Baspana úshin biz aqsha tólemeımiz, tek kommýnaldyq tólemdi ǵana óteımiz. Páterde qajettiniń barlyǵy bar, bizge barlyǵy unaıdy, - dedi qonystanýshylardyń biri Samat Kamalov.
Aıta ketý kerek, jas medıkterdi baspanamen qamtý - aımaqtaǵy basym baǵyttardyń biri. Bıylǵy jyly oblystyń ár qalasynda medıtsınalyq mamandarǵa 60 páter berý josparlanyp otyr.
