Saranda teledıdar, shańsorǵysh jáne kir jýatyn mashına shyǵaratyn zaýyt iske qosylady

ASTANA. QazAqparat – Saran qalasynda teledıdar, shańsorǵysh jáne kir jýatyn mashına shyǵaratyn zaýyt iske qosylady. Bul týraly búgin Úkimet otyrysynda Indýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Elektrotehnıkalyq mashına jasaý sektorynda Alageum Electric naryqtyń qajettiligin tolyǵymen qamtamasyz etetin transformatorlar shyǵarady. Qaznergokabel, Eýrazkabel sııaqty kásiporyndar naryqta suranysqa ıe kabeldik ónimderdi jetkizedi. Sektordyń taǵy bir mańyzdy baǵyty - turmystyq tehnıka óndirisi. Qazirgi ýaqytta Almaty oblysynda Dauscher brendimen elektr plıtalary men peshter shyǵaratyn zaýyt iske qosylǵan jáne ol tolyǵymen istep tur. Buǵan qosa, Qaraǵandy oblysynyń Saran qalasynda jańa turmystyq tehnıka, ıaǵnı teledıdarlar, shańsorǵysh jáne kir jýatyn mashına zaýyty iske qosylady. Bul salanyń damýyna serpin berip qana qoımaı, monoqalanyń jandanýyna óz úlesin qosady», - dedi mınıstr.

Onyń dereginshe, turmystyq tehnıka boıynsha Eýrazııalyq ekonomıkalyq odaq naryǵynyń áleýeti shamamen 11 mlrd AQSh dollaryn, al Qazaqstan naryǵynyń áleýeti 1 mlrd. 200 mln AQSh dollaryn quraıdy.

«Jobalardy iske asyrý kezinde keminde ishki naryqty 250 mln AQSh dollaryn quraıtyn ónimdermen tolyqtyryp, 100 mln. AQSh dollarynan astam somaǵa taýar eksportqa shyǵarylady», - dedi Marat Qarabaev.

Osyǵan deıin bıyl elimizde 5 myń traktor men 900 kombaın qurastyrylatyny habarlandy.