Saranda ekpe alǵandar arasynda baǵaly syılyqtar oınatylady

SARAN. QazAqparat – Qaraǵandy oblysyndaǵy Saran qalasynyń ákimdigi 7–15 tamyz aralyǵynda vaktsına alǵandar arasynda elektronıka jáne turmystyq tehnıka utys oıynyn ótkizedi, dep habarlaıdy QazAqparat tilshisi.

Іs-sharaǵa Saran qalasy men Aqtas kentiniń turǵyndary qatysady. Qundy syılyq alý úshin eki qarapaıym shartty oryndaý kerek. Koronavırýs vaktsınasynyń birinshi komponentin alyp, vaktsınatsııa pýnktindegi utys jýrnalyna tegi men atyn jazý qajet.

18 jastan 50 jasqa deıin vaktsınatsııa jasalǵandar arasynda smartfon, symsyz qulaqqap, smart saǵat, paýerbank jáne fen oınatylady.

50 jastan asqan jastaǵylar úshin turmystyq tehnıka oınatylady. Júldeler arasynda kir jýǵysh mashına, mıkrotolqyndy pesh, ASEL elektr peshi, blender, baıaý pisirgish jáne útik bar.

Utys oıyny tikeleı efırde 16 tamyzda saǵat 15:00-de Saran qalasy ákimi apparatynyń Instagram-daǵy paraqshasynda ótedi.