Saranda azyq-túlik dúkeniniń satýshysyn óltirgen adam ustaldy

QARAǴANDY. KAZINFORM — Keshe Saran qalasynyń aýlalarynyń birinde ornalasqan azyq-túlik dúkeninde belgisiz bireý 27 jastaǵy satýshyny pyshaqtap ketken. 

Búgin polıtseıler izin sýytpastan qylmyskerdi ustady. Qaskóı kassadan aqsha urlamaqshy bolǵan. Alǵan jaraqattary saldarynan 27 jastaǵy satýshy áıel kóz jumdy. 

Kisi óltirý deregi boıynsha qala men oblystyń tájirıbeli polıtsııa qyzmetkerlerinen arnaıy jedel-tergeý toby quryldy. Qylmysty ashý men tergeý dereý túrde PD basshylyǵynyń jáne oblys prokýratýrasynyń baqylaýyna alyndy.

Jedel is-sharalar nátıjesinde adam óltirý faktisi boıynsha polıtsııa qyzmetkerleri 50 jastaǵy kúdiktini ustady. Qaraǵandy oblysynyń PD tergeý toby qylmyskerdi qamaýǵa aldy.

— Kúdiktini aýyr qylmys jasaýǵa aqsha muqtajdyǵy ıtermelegeni anyqtaldy. Ózimen birge pyshaǵyn ala kelgen er adam kúsh qoldanyp, dúkenniń kassasyn tonamaqshy bolǵan. Alaıda satýshy qarsylyq kórsetip, qylmysker oǵan pyshaq salǵan. Saldarynan satýshy áıel kóz jumdy. Qylmys quraly — pyshaq tárkilendi, — dep habarlady Qaraǵandy oblysy ІІD baspasóz qyzmeti.

Osyǵan deıin Ulttyq ulan sarbazdary kisi óltirgen adamdy izin sýytpaı ustaǵany jaıly jazǵan bolatynbyz.