Saran zaýytynda jasalǵan jańa avtobýstar paıdalanýǵa berildi
QARAǴANDY. QazAqparat – Saran qalasyndaǵy QazTehna zaýytynda qurastyrylǵan Yutong markaly jıyrma tórt jańa avtobýs Qaraǵandydaǵy marshrýttarǵa shyǵady. Olar barlyq zamanaýı talaptarǵa jáne Evro-5 ekologııalyq klasyna sáıkes keledi, dep habarlaıdy QazAqparat.
Arbaǵa tańylǵan múgedekterge arnalǵan pandýstarmen jáne alańshalarmen, balaly analarǵa arnalǵan oryndarmen jabdyqtalǵan ár avtobýsta oǵan qosa kondıtsıoner de ornatylǵan. Syıymdylyǵy – 51 adam.
«Taksokombınat-1» JShS kólik quraldaryn «Ónerkásipti damytý qory» AQ-nan jeńildikti lızıng baǵdarlamasynyń arqasynda satyp ala aldy. Bir avtobýstyń quny 37 mln teńge.
Osylaısha tasymaldaýshy kompanııa parki 25%-ǵa jańartyldy. Avtobýstardyń ortasha tozý jasy 8-den 5 jasqa deıin tómendedi.
«Birinshi kezekte avtobýstar №1 jáne 30 marshrýttar boıynsha júredi. Sondaı-aq, biz №7, 013, 28, 31 jelilerge qyzmet kórsetemiz. Avtobýstar elektrondy bıletteý júıesine daıyn, – dedi «Taksokombınat-1» JShS dırektory Alekseı Pen.
Búgingi tańda kásiporyn alty qalalyq jáne bir qala mańyndaǵy marshrýtqa qyzmet kórsetedi. Onyń arsenalynda barlyǵy 95 avtobýs bar.
Qoǵamdyq kóliktiń tusaýkeserine Qaraǵandy oblysynyń ákimi Jeńis Qasymbek qatysty. Ol avtobýstardyń sapasyn jáne jolaýshylarǵa yńǵaıly bolý deńgeıin baǵalady. Óńir basshysynyń aıtýynsha, 2-3 jyl ishinde Qaraǵandy, Temirtaý, Saran jáne Jezqazǵandaǵy qoǵamdyq kólikter barynsha jańartylady.
«Bıyl Saran qalasy boıynsha 15 jańa avtobýs qatynaıtyn bolady. Qazir Jezqazǵanǵa 30 jańa avtobýs jetkiziledi dep kútilýde. Olar Saranda jasalady. Sonymen qatar aýdanaralyq jáne oblysishilik reısterge shyǵamyz», – dep ýáde berdi aımaq basshysy.
Maýsym aıynda qaraǵandylyq «Reıs» JM tasymaldaýshysy úshin 16 jańa avtobýs jetkiziledi dep kútilýde.
