Saran turǵyndaryna jylýdyń tólemi qaıta esepteledi

ASTANA. KAZINFORM – Saran qalasynda úılerdi jylýmen jabdyqtaýdyń rezervtik júıesine qaıta qosý aıaqtaldy. Qazandyqtar qajetti otyn qorymen jáne jumysshylarmen qamtamasyz etilgen, dep habarlaıdy Kazinform tilshisi. 

Qazir basty maqsat – turǵyn úılerdi sapaly jylytýdy qamtamasyz etý.

– Men qala turǵyndarynyń narazylyǵyn túsinemin. Jaǵdaı turaqtanǵannan keıin biz mindetti túrde jaýapty árbir adamnyń is-áreketin taldap, baǵalaıtyn bolamyz, - dep atap ótti Qaraǵandy oblysynyń ákimi Ermaǵanbet Bólekpaev apparattyq keńeste.

Sondaı-aq Saran qalasynyń basshysy Erkin Baýlyqov qalany jylýmen qamtamasyz etý jaǵdaıy týraly baıandady.

– Barlyq úı rezervtik jylýmen jabdyqtaý júıesine qaıta qosylǵan. Barlyq jergilikti jylý kózi iske qosyldy. Bir oram jumys istep turǵan qazandyqqa qaıta qosyldy. Jylý kózderinde qajetti otyn qory bar. Qosymsha kómir tasymaldaý qamtamasyz etildi. Qazandyqtarda jumysshylar da jetkilikti. Ortalyq jylý kózin paıdalanýǵa bergenge deıin qalany jylýmen jabdyqtaý rezervtik júıe arqyly qamtamasyz etiletin bolady, - dep atap ótti ol.

Qazan aıynda Saran turǵyndaryna jylýmen jabdyqtaý úshin qaıta esepteý júrgiziledi.

Esterińizge sala keteıik, Saran qalasynda turǵyndar úılerde jylýdyń joqtyǵyna jappaı shaǵymdana bastaǵan. Qala ákimi Erkin Baýlyqov Instagram-daǵy paraqshasynda jaǵdaıdy túsindirip, turǵyndardan keshirim surady.

Saran qalasyndaǵy jylý jaǵdaıyna baılanysty Energetıka mınıstri bastaǵan komıssııa quryldy. Komıssııa quramyna energııa qadaǵalaý salasynyń jáne tıisti organdardyń ókilderi kirdi. Almasadam Sátqalıev Sarandaǵy qazandyqtyń iske qosylmaýynyń sebepterin atady.