«Saran» shahtasynda qaza tapqandardyń otbasylary turǵyn úı jaǵdaıyn jaqsartýdy surady
QARAǴANDY. QazAqparat - «ArselorMıttal Temırtaý» kompanııasy «Saran» shahtasynda qaza tapqandardyń otbasy músheleriniń barlyq ótinishterin oryndaıdy, dep habarlaıdy «QazAqparat» HAA tilshisi.
«Biz ár otbasymen kezdesip, qandaı kómek kórsetetinimizdi habardar ettik. Bizde ujymdyq kelisimshartta kórsetilgen kóptegen mindettemeler bar. Onda 10 jyldyq jalaqy (ótemaqy - avt.), qaza tapqandardyń balalaryna, ata-anasyna, jubaılaryna shıpaıjaıǵa joldama berý kórsetilgen. Qarjylyq kómek suraý múmkindigi, balalary men jubaılaryn oqytý aıtylǵan. Sonymen qatar, bul jerde kórsetilmegen kóptegen aıqyndamalar berilgen. Keıinirek úılestiremiz», - dedi «ArselorMıttal Temırtaý» AQ kómir departamentiniń dırektory Evgenıı Romaşın, TJ arnaıy tekserý komıssııasy aktisin jarııalannan keıin jýrnalısterdiń suraǵyna jaýap bere otyryp.
Ol qaıtys bolǵan kenshiler otbasylarynyń turǵyn úı jaǵdaıyn jaqsartý týraly ótinishterin atap ótti. «Biz ujymdyq kelisimshart mindettemeleri men qosymsha birqatar mindetterdi oryndaımyz», - dep qorytty óz sózin E.Romaşın.
Komıssııa azamattyq qorǵaý zańnamasyn buzǵany úshin kompanııaǵa jaýapkershilik júktedi. Komıssııa ókilderi búgingi tańda zardap shegýshilerdiń tórteýiniń biri aýrýhanada qalatynyn habarlady. Al, úsheýi jazylyp shyqqan.
Komıssııa músheleriniń aqparatyna súıensek, zaqymdanýshylar psıhologııalyq jaraqat alǵan jáne mamandardyń kómegine zárý.
Aıta keterligi, búgin arnaıy komıssııa tóraǵasy, QR IDM Indýstrıaldy damý jáne óndiristik qaýipsizdik komıteti tóraǵasynyń orynbasary Nurbek Qunanbaevtyń málimdeýi boıynsha «ArselorMıttal Temirtaý» AQ kómir departamentiniń «Saran» shahtasyndaǵy qaıǵyly apatqa qylmystyq nemquraıdylyq sebepshi bolǵan.
Komıssııa qaıǵyly oqıǵaǵa ákep soqqan oqıǵanyń uıymdastyrýshylyq jáne tehnıkalyq sebepterin anyqtady.
Komıssııa jumysynyń qorytyndysy boıynsha, Saran shahtasynyń dırektory men orynbasarlarynan bastap 16 qyzmetker jumysynan shettetildi.
Eske sala ketsek, 10 qarashada Qaraǵandy oblysyndaǵy «ArselorMıttal Temirtaý» AQ kómir departamentiniń «Saran» shahtasynda apat boldy, úsh adam qaza taýyp, bes adam zardap shekti. Mert bolǵandar arasynda 32 jastaǵy Meıram Janysbaev, 56 jastaǵy Edýard Lesnekov, 56 jastaǵy Murat Nurmaǵambetov bar. Keıinirek Qaraǵandyda Maqajanov atyndaǵy klınıkada «Saran» shahtasynyń jumysshysy 52 jastaǵy Mıhaıl Panın kóz jumdy.
