Saran shahtasyndaǵy apattan úsh jumysshy zardap shekti, bireýi jansaqtaý bóliminde jatyr
QARAǴANDY. KAZINFORM – «Saran» shahtasynda oryn alǵan apattyń saldarynan 3 adam zardap shekkendigin tekserý úshin Memlekettik eńbek ınspektsııasy komıtetiniń Qaraǵandy oblysy boıynsha departamenti komıssııa qurýda.
«2024 jyldyń 14 qazanynda saǵat 23:00–de „Qarmet“ AQ Kómir departamentine qarasty „Saran“ shahtasynda apat boldy. 41K-7V uzyn qabyrǵasynyń tómengi túıispesinde jumys isteý kezinde metall bekitkish profılin jyljytqan kezde ústińgi bólikterden taý jynystarynyń bir bóligi arshylyp, jumysshylar jaraqat alǵan: taý-ken tazartý jumysshysy D. Sembekov (1988 j. t.), ken sheberi A. Grıgorevıch (1989 j. t.) jáne taý-ken mehanızatory A.Rýdııa (1983 j. t.)», — dep jazdy Eńbek jáne halyqty áleýmettik qorǵaý mınıstrliginen.
Apat saldarynan kompanııa qyzmetkerleri túrli dene jaraqattaryn alǵan. Olarǵa alǵashqy medıtsınalyq kómek kórsetilip, zardap shekkender professor H. J. Maqajanov atyndaǵy oblystyq travmatologııa jáne ortopedııa atyndaǵy oblystyq ortalyqqa jetkizildi.
Dárigerler teksergennen keıin D. Sembekov pen A.Grıgorevıch eńbekke jaramsyzdyq paraǵyn ashpaı úılerine jiberildi.
A.Rýdıı qazir jansaqtaý bóliminde jatyr.
«Jazataıym oqıǵany tekserý úshin Memlekettik eńbek ınspektsııasy komıtetiniń Qaraǵandy oblysy boıynsha departamenti komıssııa qurýda. Oqıǵanyń mán-jaıy men sebepteri tergeý barysynda anyqtalady», - delingen vedomstvonyń aqparatynda.
