Saran qalasyndaǵy mektepke bıometrııa týrnıketi ornatyldy degen aqparat jalǵan
SARAN. QazAqparat – Saran qalasyndaǵy mektepke bıometrııa týrnıketi ornatyldy degen aqparat jalǵan, dep habarlaıdy QazAqparat stopfake.kz-ke silteme jasap.
Áleýmettik jelide Qaraǵandy oblysynyń Saran qalasynda mekteptiń birinde engizilgen jańashyldyq týraly aqparat tarady. Onda bet-álpetti taný fýnktsııasy bar týrnıket ornatylǵan, sondaı-aq ata-analar ony paıdalanǵany úshin aqy tóleýge májbúr. Qaraǵandy oblysynyń Bilim basqarmasy bul aqparatty joqqa shyǵardy.
«Bul feık. Týrnıket adamnyń bet-álpetin tanymaıdy, olar dene temperatýrasyn ólsheýge arnalǵan. Ata-analar ol úshin aqsha tólemeıdi», – dep habarlady vedomstvodan.
Buǵan deıin mundaı týrnıketter óńirdiń basqa mektepterinde de ornatylǵan. Qaraǵandy qalasynyń №104 mektep-lıtseıinde ornatylǵan alǵashqy týrnıket týraly aqparat Qaraǵandy oblysy ákimdiginiń resmı saıtynda jarııalandy. Qurylǵy bir ýaqytta 30 adamnyń dene temperatýrasyn anyqtaı alady. Eger bireýiniń temperatýrasy 37 gradýstan joǵary bolsa, kirýge jol berilmeıdi.
Demek, qurylǵylar adamnyń betin tanı almaıdy. «Ata-analardy jańa týrnıketterdi paıdalanǵany úshin tóleýge mindetteıtini» týraly aqparat ta feık.
