Saran qalasynda qaraýsyz qalǵan kópqabatty úıler jóndelýde

SARAN. QazAqparat – Qaraǵandy oblysy Saran qalasyna qarasty qaraýsyz qalǵan bes qabatty ondaǵan úı qalpyna keltiriledi. Bul úıler RTB zaýyty (Rezıno-tehnıkalyq buıymdar zaýyty) aýdanynda ornalasqan, dep habarlaıdy QazAqparat tilshisi.

1990 jyldardyń basynan beri munda 106 úı ıesiz qaldy. Qazirgi ýaqytta olarǵa tekserý júrgizildi, teń jartysy qaıta jóndeýge jatpaıdy. Ýaqyt óte kele olardy buzyp, ornyna jańa úıler salý josparlanyp otyr.

Kenttiń jandanýyna QazTehna avtobýs zaýytynyń ashylýy jáne reseılik «Tatneft» kompanııasynyń avtomobıl shınalaryn shyǵaratyn kásiporynnyń qurylysy túrtki boldy.

«Jańa ındýstrııalyq aımaqtyń qurylýy jáne iri óndiris qurylysynyń bastalýy shaǵyn aýdannyń 11 gektar turǵyn úı aımaǵyn qalpyna keltirýge múmkindik berdi. Qazir sot arqyly páter boıynsha zańdy «tazartýdan» ótken jáne balansqa qoıylǵan úıler qalpyna keltirilýde. Ótken jyly biz eki úıdi qalpyna keltirdik. Olardyń birinde – 60 páter, ekinshisinde – 30. Halyqtyń áleýmettik osal toptaryna páterler berildi. Bıyl toǵyz úıdi qalpyna keltirý jumystary bastaldy», – dep atap ótti Saran qalasynyń ákimi Erjan Temirhanov.

Kelesi jyly toǵyz úıdi tapsyrý josparlanýda. Barlyǵy 510 páter bolady. Bul – kezekte turǵandar, dárigerler men kásiporyn qyzmetkerleri úshin jalǵa beriletin jáne qyzmettik turǵyn úı. Búgingi tańda Saran qalasynda páter kezeginde myńǵa jýyq adam tur.

Injenerlik jelilermen – sýmen, elektr qýatymen turǵyndarda problemalar joq. Úılerdi jylýmen qamtamasyz etý úshin modýldik qazandyq salynady.

Úılerdi qalpyna keltirýmen qatar aýlalar abattandyrylyp, joldar asfalttalady. Áleýmettik ınfraqurylym qalyptasýda. Balabaqsha men sport keshenin salý úshin jer telimi satyp alyndy. «Saryarqa» ÁKK birlesip áleýmettik pavılon ornatady.

«Sondaı-aq, áleýmettik dárihana bolady, polıtsııa bólimin ashamyz. Qazirdiń ózinde shaǵyn aýdanda beınebaqylaý ornatylǵan, ıaǵnı qaýipsiz ortany qalyptastyrýǵa bolady. Jalpy, biz jyl saıyn 10 úıdi qalpyna keltirýdi josparlap otyrmyz. Buzylǵan kóp qabatty úılerdiń ornyna jańa qurylys salynady», – dedi Erjan Temirhanov.

«Men qyzymmen birge sáýir aıynan beri turamyn. «Jetim balalar» sanaty boıynsha eki bólmeli páterdi tez rada aldym. Qazir qurylys belsendi júrip jatyr. Úılerdi qalpyna keltirýden basqa, jol jasalýda, oıyn alańy ornatyldy. Maǵan bári unaıdy. Avtobýs júredi, qajet jerge jetý múmkindigi bar. Ázirshe bala kútimine baılanysty demalysta otyrmyn, «Saran» shahtasynda aspaz bolyp jumys isteımin. Kásiporynnyń janynda jumys bolatyny jáne shaǵyn aýdan jandanatyny jaqsy», – deıdi qalpyna keltirilgen úılerdiń biriniń turǵyny Vıoletta Fılıpova.