Saran qalasynyń ákimi qyzmetinen bosatyldy
QARAǴANDY. KAZINFORM - Saran qalasynyń ákimi Erkin Baýlyqov qyzmetinen bosatyldy. Ol jaıly Qaraǵandy oblysynyń ákimdiginde málim etti, dep habarlaıdy Kazinform tilshisi.
«Qaraǵandy oblysy ákiminiń ókimimen Saran qalasynyń basshysy Erkin Baýlyqov qalada jylý berý maýsymynyń bastalýynda olqylyq jibergeni úshin atqaratyn qyzmetinen bosatyldy. Qala basshysy mindetin ýaqytsha osyǵan deıin Saran qalasy ákiminiń orynbasary bolǵan Maqsat Qaıreshov atqaratyn bolady», - dep málimdedi Qaraǵandy oblysy ákiminiń baspasóz qyzmeti.
Erkin Baýlyqov Saran qalasynyń ákimi laýazymyna taǵaıyndalǵanyna kóp bolǵan joq. Bul qyzmetke ol 2023 jylǵy 21 qyrkúıekte kirisken bolatyn.
Erkin Baýlyqov 2016 jyldan 2019 jylǵa deıin QR Memlekettik qyzmet isteri jáne sybaılas jemqorlyqqa qarsy is-qımyl agenttiginde túrli laýazymdar atqardy.
Sondaı-aq elordada QR Ulttyq ekonomıka mınıstrliginiń Memlekettik basqarý júıesin damytý departamentinde eńbek etti. Sodan keıin Saran qalasynyń jumyspen qamtý jáne áleýmettik baǵdarlamalar bólimin basqardy.
2021 jylǵy jeltoqsannan bastap osy taǵaıyndaýǵa deıin Saran qalasy ákiminiń orynbasary boldy.
Osyǵan deıin Saran qalasynda turǵyndar úılerde jylýdyń joqtyǵyna jappaı shaǵymdana bastaǵany týraly jazǵan bolatynbyz.
Qala ákimi Erkin Baýlyqov Instagram-daǵy paraqshasynda jaǵdaıdy túsindirip, turǵyndardan keshirim surady.
Saran qalasyndaǵy jylý jaǵdaıyna baılanysty Energetıka mınıstri bastaǵan komıssııa quryldy. Komıssııa quramyna energııa qadaǵalaý salasynyń jáne tıisti organdardyń ókilderi kirdi. Almasadam Sátqalıev Sarandaǵy qazandyqtyń iske qosylmaýynyń sebepterin atady.
Búgin apparattyq jınalysta Qaraǵandy oblysynyń ákimi Ermaǵanbet Bólekpaev Saran qalasynyń ákimi Erkin Baýlyqov pen Qaraǵandy oblysynyń energetıka jáne TKSh basqarmasynyń basshysy Tilektes Dosaev qatań sógis alǵanyn málimdedi. Sondaı-aq oblys ákiminiń birinshi orynbasary Azamat Taıjanovqa eskertý túrinde tártiptik jaza jarııalandy.
