Saran qalasyndaǵy turǵyn úılerge jylý jetpeı jatyr
QARAǴANDY. KAZINFORM – Saran qalasynyń turǵyndary úıleri jylymaı jatqanyna shaǵymdanýda. Qala ákimi Erkin Baýlyqov Instagram-daǵy paraqshasynda atalǵan jaǵdaıǵa qatysty jazba jarııalady, dep habarlaıdy Kazinform agenttiginiń tilshisi.
Saran qalasynyń turǵyndary áleýmettik jelilerde úılerinde jylýdyń bolmaýyna baılanysty jappaı narazylyǵyn bildire bastady. Ásirese, keıingi táýlikte aýa raıynyń kúrt sýytýyna baılanysty halyqtyń shaǵymy arta tústi.
Qyrkúıektiń sońynda jergilikti bılik jańa jylý ortalyǵynyń iske qosylǵany týraly resmı túrde jarııalaǵan bolatyn. Jergilikti bılik ortalyq jylý kóziniń qýaty arta túsedi dep ýáde bergen edi. Alaıda, turǵyn úılerdiń basym bóliginde áli kúnge deıin jylý joq.
Qala ákimi Erkin Baýlyqov Instagram-daǵy paraqshasynda jaǵdaıdy túsindirip, turǵyndardan keshirim surady.
«Ókinishke qaraı bizdegi qazandyq endi ǵana iske qosyldy. Sondyqtan jylý kezeń-kezeńmen berilýi qajet. Barlyq qajetti jumys qolǵa alyndy. Kómirdiń qory jetkilikti jáne barlyq qajetti shyǵyn materıaldary da bar. Biz óz jumysymyzdy jalǵastyramyz. Turǵyndardan týyndaǵan qolaısyzdyqtar úshin keshirim suraımyn. Jaqyn arada barlyq úıge jylý beriledi», - dedi ol.
Qala ákimdiginiń baspasóz qyzmeti habarlaǵandaı, qazirgi ýaqytta ortalyqtaǵy jylý kózi iske qosyldy.
«Bir qazandyq jumys istep tur, rejımdik retteý júrgizilýde. Temperatýra kórsetkishteri birtindep artyp keledi. Úılerge eń mınımaldy temperatýra jiberilip jatyr. Kómir men otyn qory jetkilikti, jumyskerler de jetkilikti. Sondaı-aq qalada 95 úıdi jylýmen qamtamasyz etetin 8 jergilikti qazandyq jumys istep tur. Rezervte 9 jergilikti qazandyq bar, olar qajet bolǵan jaǵdaıda búgin iske qosylady», - dep habarlady ákimdikten.
Qazirgi ýaqytta 150 úıge jylý berildi. Barlyq áleýmettik nysan jergilikti qazandyqtarmen jylytylady.
