Saran qalasyna jańa ákim taǵaıyndaldy
QARAǴANDY. KAZINFORM – QR Prezıdenti Ákimshiliginiń jáne qalalyq máslıhat depýtattarynyń kelisimi boıynsha Saran qalasynyń ákimi bolyp buryn Qaraǵandy oblysynyń ónerkásip jáne ındýstrııalyq-ınnovatsııalyq damý basqarmasynyń basshysy qyzmetin atqarǵan Daryn Bulqaıyr taǵaıyndaldy, dep habarlaıdy Kazinform tilshisi.
Jańa qala basshysyn qalalyq máslıhattyń kezekten tys sessııasynda oblys ákimi Ermaǵanbet Bólekpaev tanystyrdy. Depýtattar kandıdatýrany maquldady.
Saran basshysyna qalany damytýdyń basym mindetteri belgilendi.
Daryn Bulqaıyr 2012 jyldan bastap memlekettik qyzmet salasynda qyzmet atqaryp keledi. Qaraǵandy qalasy ákiminiń apparatynda memlekettik-quqyqtyq bóliminiń bas mamany bolyp jumys istedi.
2013 jyldan 2015 jylǵa deıin «Qaraǵandy qalasynyń turǵyn úı qatynastary bólimi» MM bas mamany, basshysynyń orynbasary boldy.
Sodan keıin Qaraǵandy oblysynyń energetıka jáne turǵyn úı-kommýnaldyq sharýashylyq basqarmasynda — bas maman-zańger, bıýdjetti atqarý bóliminiń bas mamany, memlekettik satyp alý jáne quqyqtyq jumys bóliminiń basshysy bolyp jumys istedi.
2017 jyldan 2021 jylǵa deıin Qaraǵandy qalasy Oktıabr aýdany ákiminiń orynbasary qyzmetin atqardy.
2021 jyldan 2023 jyldyń shildesine deıin Qaraǵandy oblysynyń jer qatynastary basqarmasyn basqardy.
2023 jyldyń shildesinen bastap osy taǵaıyndaýǵa deıin Qaraǵandy oblysynyń ónerkásip jáne ındýstrııalyq-ınnovatsııalyq damý basqarmasyn basqardy.
Osyǵan deıin Saran qalasynda turǵyndar úılerde jylýdyń joqtyǵyna jappaı shaǵymdana bastaǵany týraly jazǵan bolatynbyz.
Qala ákimi Erkin Baýlyqov Instagram-daǵy paraqshasynda jaǵdaıdy túsindirip, turǵyndardan keshirim surady.
Saran qalasyndaǵy jylý jaǵdaıyna baılanysty Energetıka mınıstri bastaǵan komıssııa quryldy. Komıssııa quramyna energııa qadaǵalaý salasynyń jáne tıisti organdardyń ókilderi kirdi. Almasadam Sátqalıev Sarandaǵy qazandyqtyń iske qosylmaýynyń sebepterin atady.
28 qazanda apparattyq jınalysta Qaraǵandy oblysynyń ákimi Ermaǵanbet Bólekpaev Saran qalasynyń ákimi Erkin Baýlyqov pen Qaraǵandy oblysynyń energetıka jáne TKSh basqarmasynyń basshysy Tilektes Dosaev qatań sógis alǵanyn málimdedi. Sondaı-aq oblys ákiminiń birinshi orynbasary Azamat Taıjanovqa eskertý túrinde tártiptik jaza jarııalandy.
29 qazanda Saran qalasynyń ákimi Erkin Baýlyqov qyzmetinen bosatyldy.