Saran qalasy qazandyǵynyń qurylysy kezinde 460 mln teńge jymqyrylǵan
QARAǴANDY. KAZINFORM – Saran qalasyndaǵy ortalyq jylý kóziniń qurylysy kezinde 461 mln teńge urlanǵan. Bul týraly Qaraǵandy oblysy boıynsha Ekonomıkalyq tergeý departamenti málim etti.
Sarannyń ortalyq jylý kózi tóńireginde janjal basylar emes. Qaraǵandy oblysynyń ekonomıkalyq tergeý departamenti habarlaǵandaı, tekserý barysynda jylý ortalyǵynyń qurylysy barysynda qarajat jymqyrý deregi anyqtalǵan.
«Qýatty óńirler – el damýynyń draıveri» ulttyq jobasy boıynsha Saran qalasyndaǵy Ortalyq qazandyqtyń qurylysy kezinde 461 mln teńgeni urlaý faktisi belgili boldy. Bul ulttyq jobanyń áleýmettik mańyzy zor. Monoqala men ónerkásip nysandarynyń turǵyndaryn jylýmen qamtamasyz etý kózdelgen bolatyn, alaıda joba uzaqmerzimdi qurylysqa aınalyp, osy ýaqytqa deıin paıdalanýǵa berilmegen», - dep jazdy Qaraǵandy oblysy boıynsha Ekonomıkalyq tergeý departamentiniń baspasóz qyzmetinen.
Aıta ketý kerek, bul is boıynsha tergeý áli de jalǵasýda. Vedomstvo ókilderi bul iske qatysty egjeı-tegjeıli túsinikteme bermedi.
Eske salsaq, ótken jyldyń qazan aıynda Saran qalasynda turǵyndar úılerde jylýdyń joqtyǵyna jappaı shaǵymdana bastaǵany týraly jazǵan bolatynbyz.
Qala ákimi Erkin Baýlyqov Instagram-daǵy paraqshasynda jaǵdaıdy túsindirip, turǵyndardan keshirim surady.
Saran qalasyndaǵy jylý jaǵdaıyna baılanysty Energetıka mınıstri bastaǵan komıssııa quryldy. Komıssııa quramyna energııa qadaǵalaý salasynyń jáne tıisti organdardyń ókilderi kirdi. Almasadam Sátqalıev Sarandaǵy qazandyqtyń iske qosylmaýynyń sebepterin atady.
28 qazanda apparattyq jınalysta Qaraǵandy oblysynyń ákimi Ermaǵanbet Bólekpaev Saran qalasynyń ákimi Erkin Baýlyqov pen Qaraǵandy oblysynyń energetıka jáne TKSh basqarmasynyń basshysy Tilektes Dosaev qatań sógis alǵanyn málimdedi. Sondaı-aq oblys ákiminiń birinshi orynbasary Azamat Taıjanovqa eskertý túrinde tártiptik jaza jarııalandy.
29 qazanda Saran qalasynyń ákimi Erkin Baýlyqov qyzmetinen bosatyldy. Onyń ornyna Daryn Bulqaıyr taǵaıyndaldy.