Saralanǵan tarıfter: Halyq kottedjde turatyndar úshin tóledi
ASTANA. QazAqparat - Búgin Ulttyq ekonomıka vıtse-mınıstri Serik Jumanǵarın dıfferentsıaldy tarıfterdi ne sebepti alyp tastaǵanyn túsindirdi, dep habarlaıdy QazAqparat tilshisi.
«Endi, qarańyz, elektr energııasy úshin kúndizgi tarıf 15 teńge boldy. Keshki tarıf - 31 teńge, al túngi ýaqytta 4-6 teńge aldy. Sonda túngi tarıf energııany óndirý baǵasynan da tómen boldy. Bizde jeke sektorda turatyn keıbir úıler bir aıda 6 megavatqa deıin tutyndy. Bul shaǵyn zaýytqa ketetin energııamen birdeı. Demek, dıfferentsıaldy tarıfter energııany sý tegin tutynýǵa múmkindik berdi», - dedi S.Jumanǵarın búgin Parlament Májilisinde tarıfterdi belgileý máselesine arnalǵan jıynda.
Vıtse-mınıstrdiń sózine qaraǵanda, dıfferentsıaldy tarıfter kezinde kópqabatty úılerde turatyn halyq kottedj ıeleri úshin tóleıdi. Sebebi zań boıynsha monopolıst túngi tarıf sııaqty jeńildikterden shyǵyn kórse, sonyń barlyǵyn jalpyǵa ortaq tarıf arqyly óteı alady.
«Máselen, men páterde turamyn. Jylý bárimizge ortaq. Maǵan túngi tarıfke kóshýdiń qajeti joq. Degenmen, ondaı jeńildikti barynsha paıdalanǵan adamdar boldy. Al túngi tarıftiń mólsheri energııanyń óz baǵasynan tómen bolǵandyqtan, zań boıynsha monolısterdiń ondaı shyǵyndary ótelýi tıis. Sonda olar jyl saıyn túngi tarıften kelgen shyǵyndaryn bizge ákeledi. Al qańtar aıynan bastap biz jalpyǵa ortaq tarıfterdi týra sol shyǵyndar óteletindeı kóterip otyrdyq. Bylaısha aıtqanda, halyqtyń basym bóligi (páterde turatyndar - avt.) óz úılerin elektr energııasymen jylytyp otyrǵandar úshin tólep keldi. Qazir biz bárin óz ornyna keltirdik», - dedi S.Jumanǵarın.
Onyń aıtýynsha, dıfferentsıaldy tarıfter kezinde iri kásiporyndar da, shaǵyn bıznes te atalǵan jeńildikti paıdalana almady. Sebebi eńbek zańnamasyna sáıkes, túngi ýaqytta qyzmetkerlerdi jumysta ustaýǵa bolmaıdy. Al keshki 19:00-den 23:00-ge deıin olar 1 kVT úshin 31 teńge tóledi. Bul ádettegi tarıften eki esege artyq.
«2014 jyly atalǵan máseleni birinshi bolyp Pavlodar oblysynyń bıznesmenderi kóterdi. Olarǵa Batys Qazaqstan qosyldy. Sodan keıin Parlament Májilisinde «dóńegelek ústel» ótti. Sol kezde marqum Dıachenko Úkimetke depýtattyq saýal joldap, dıfferentsıaldy tarıfterdi alyp tastaýdy surady. Biz de taldaý ótkizdik. Oǵan sáıkes, 2019-2014 jyldary, ıaǵnı bes jyldyń ishinde túngi tarıfterdi tutynatyn adamdardyń sany tek jarty protsentke ǵana kóbeıdi. Menińshe, ekologııa men tarıftiń arasynda eshqandaı baılanys joq. Bul - taza popýlızm», - dep atap kórsetti S.Jumanǵarın.
Aıta keteıik, búgin Parlament Májilisinde Astana qalasy Qoǵamdyq keńesiniń tóraǵasy Sansyzbaı Esilov túngi tarıfti qaıta engizý máselesin taǵy da kóterdi.
Onyń oıynsha, atalǵan tarıftiń arqasynda qala ekologııasyn jaqsartýǵa bolady. S.Esilov ol jaıynda buǵan deıin de aıtqan.
«Menińshe, bul problemany kesheýildetpeı sheshý qajet. Onyń birneshe ádisi bar. Kezinde elektr energııasyna saralanǵan tarıf, ıaǵnı túngi tarıf engizgen edik. Sol kezde kóptegen kotedjdiń ıeleri túngi ýaqytta elektr energııasyn paıdalanatyn. Al qazir kúni-túni kómir jaǵyp otyr. Úkimet sebebin túsindirmesten saralanǵan túngi tarıften bas tartty. Al kezinde osy tarıfti engizgen kezde muny elektr energııasyn óndirýshiler úshin de, halyq úshin de jaqsy ári tıimdi bolaryn aıtqan edi. Atalǵan túngi tarıfti qaıtaryp, problemany birshama sheshýge bolady», - degen bolatyn S.Esilov.
