Sara Braıtman orbıtadan Ýebberdiń mýzykasyna jazylǵan ándi oryndaýǵa ázirlenýde
ASTANA. QazAqparat - Brıtandyq ánshi jáne bolashaq ǵaryshtyq týrıst Sara Braıtman kompozıtor Endrıý Lloıd Ýebbermen birge orbıtadan oryndalatyn ánmen jumys jasaýda, dep habarlady RIA Novostı.
Braıtman Halyqaralyq ǵarysh stansasynda bolatyn segizinshi ǵaryshtyq týrıst bolmaq. Onyń birge ushatyn MKS-45/46 ekspedıtsııasynyń ekıpajynda reseılik ǵaryshker Sergeı Volkov pen Eýropalyq ǵarysh agenttiginiń astronavty Andreas Mogensen bolady dep josparlanýda.
«Men jerdegi ártispen qosylyp, dýetpen án salǵym keledi... Biz qazirgi kezde Lloıd Ýebbermen osy baǵytta jumys jasaýdamyz», - dedi ánshi Londondaǵy baspasóz máslıhatynda.
Ol ázirlenip jatqan ánniń búge-shigesin aıtpady, kompozıtordyń ádemi áýen oılap shyǵarǵanyn ǵana jetkizdi. Ánshiniń aıtýynsha, ol ǵaryshqa attanýǵa asyǵýly, ol úshin Reseıdegi Juldyzdy qalashyqta 16 saǵattyq jattyǵýdan ótýde. Braıtmannyń HǴS-qa ushýy 1 qyrkúıekke josparlanǵan, bul sapar 10 kúnge sozylady.
«Adamzat Aıǵa alǵash qonǵanda men 9 jasta edim, sodan beri ǵarysh meni ózine baýrap aldy», - dedi ol.
Braıtman óziniń ánshilik jolynda 30 mıllıonǵa jýyq ánderin satýǵa shyǵarǵan, al ǵaryshqa ushyrýǵa óz qarjysyn jumsaıtynyn aıtty, alaıda kelisim-shart boıynsha ǵaryshqa saıahat qansha qarajatqa túsetini qupııa ekenin málim etti.
