Sara Alpysqyzynyń týǵan kúnine arnalǵan balalardyń qatysýymen sharalar ótip jatyr
ALMATY. 11 aqpan. QazAqparat /Áıgerim Ámir/ - Almatyda elimizdiń birinshi hanymy, «Ózin-ózi taný» rýhanı-adamgershilik bilim berý baǵdarlamasynyń avtory Sara Nazarbaevanyń týǵan kúnine arnalǵan merekelik sharalar bastaldy.
Shara barysynda balalardyń sýret, shyǵarma, ashyqhat, qol óner baıqaýlary, án festıvali, sahnalandyrylǵan kórsetilimder, merekelik kontsertter uıymdastyrý josparlanýda. Eń bastysy, osy sharalar arqyly balalar Bas analary Sara Alpysqyzyna degen óz ystyq yqylas-nıetterin bildire alady, deıdi uıymdastyrýshylar.
Qazaqstan Respýblıkasy Bilim jáne ǵylym mınıstrligi Balalardyń quqyqtaryn qorǵaý komıteti Sara Alpysqyzy Nazarbaevanyń mereıtoıyna arnalǵan 7 men 12 aqpan aralyǵynda ótetin sharalar baǵdarlamasyn daıyndaǵan bolatyn. Osyǵan sáıkes búgin Almaty qalasynyń ákimdigi Balalardyń quqyqtaryn qorǵaý departamentimen birlesip, belgili respýblıka ártisteri jáne balalar shyǵarmashylyq ujymdarynyń qatysýymen «Mahabbatqa toly júrek» atty saltanatty shara ótkizedi.
Sondaı-aq, erteń áleýmettik mekemeler jetim jáne ata-anasynyń qamqorlyǵynsyz qalǵan balalar úıinde keń kólemdi sharalar ótkizilmek. Olar: №1 Balalar úıinde «Mahabbatpen...» atty merekelik shara; №2 Balalar úıinde «Biz birge - tatý otbasymyz!» atty mereke; «Januıa» arnaıy kesheninde «Álem qandaı tamasha!» atty kontsert; №8 arnaıy mektep-ınternatynda «Jańa bastaýdan...» atty mýzykalyq festıval; Úmit úıinde «Bári mahabbattan bastalady» atty merekelik kontserttik baǵdarlama jáne SOS «Almaty qalasynyń Balalar qalashyǵynda» «Qazaqstandyq anaǵa arnalady...» atty mádenı baǵdarlama.
Sara Nazarbaevanyń bastamasymen 2010 jyldyń 1 qyrkúıeginde óskeleń urpaqty jalpyadamdyq qundylyqtar negizinde tárbıeleýge baǵyttalǵan «Ózin-ózi taný» rýhanı-adamgershilik bilim berý baǵdarlamasy jappaı engizildi. Ózin-ózi taný - erekshe pán. Sabaq barysynda balalar adamgershilik qasıetterge, abyroı men namysty baǵalaýǵa úırenedi. Jańashyldyqqa talpyný, jaqsylyq jasaýǵa, rýhanı, áleýmettik jáne shyǵarmashylyq damý úılesimdiligine jetýge beıimdeledi.
