Sara Alpysqyzy respýblıka boıynsha 72 talapkerge bilim berý grantyn tabystady
MATY. 24 tamyz. QazAqparat /Ádilet Musahaev/ -Búgin Almatydaǵy «Bóbek» ulttyq ǵylymı-tájirıbelik, bilim berý jáne saýyqtyrý ortalyǵynda Sara Alpysqyzynyń bilim granttaryn saltanatty túrde tabystaý rásimi ótti.
2011 jyly 17 mamyrda jarııalanǵan QR joǵary oqý oryndarynda, tehnıkalyq jáne kásibı bilim berý mekemelerinde oqýǵa Sara Alpysqyzynyń bilim grantyn taǵaıyndaý týraly erejege sáıkes baıqaý jeńimpazdary anyqtalǵan. Atalmysh is-shara alǵashqy ret uıymdastyrylǵan. Respýblıka boıynsha 72 talapker bilim granttarynyń ıegeri atandy.
Sara Alpysqyzynyń bilim granttary jetim balalarǵa, qamtamasyz etilmegen kópbalaly otbasydan shyqqan balalarǵa, asyraýshysynan aıyrylyp, ata-anasynyń biriniń qamqorynda qalǵan balalarǵa áleýmettik kómek kórsetý maqsatynda taǵaıyndalǵan bolatyn.
Baıqaýdyń birinshi kezeńi 2011 jyldyń 15 maýsym - 20 shilde aralyǵynda oblys ortalyqtarynda, ekinshi kezeńi 15-17 tamyz aralyǵynda «Bóbek» ulttyq ǵylymı-tájirıbelik, bilim berý jáne saýyqtyrý ortalyǵynda ótkizilgen.
Baıqaýdyń ekinshi kezeńine respýblıka boıynsha barlyǵy 97 bala qatysyp, 72-si JOO-da, tehnıkalyq jáne kásibı bilim berý mekemelerinde bilim alýǵa múmkindik alǵan, onyń 53-i joǵary oqý oryndarynda, 19-y kolledjde bilim alady. Grant ıegerleriniń tizimi otandyq resmı basylymdarda jarııalanǵan.
Shara barysynda elimizdiń birinshi hanymy, «Bóbek» qaıyrymdylyq qorynyń Prezıdenti Sara Alpysqyzy úlken ómirge aıaq basqaly otyrǵan jastarǵa óziniń analyq tilegin jetkizip, adamgershilik qundylyqtaryn saqtaı otyryp, abyroıly azamat atanýlaryn tiledi. «Adam ómirde óziniń adamgershiligimen, eshkimge jamandyq oılaımaı, tek jaqsy isterdi atqarýymen qundy ári abyroıly keledi. Sondyqtan tek jaqsy isterdi atqaryp, ultymyzdyń ónegeli azmattarynyń qatarynan tabylýlaryńdy tileımin», -dep atap ótti S.Alpysqyzy.
Jastar da óz kezeginde Sara Alpysqyzynyń jasap otyrǵan qaıyrymdylyǵyna alǵystaryn bildirip, qýanyshty áserlerimen bólisti.
Anasynan erte aıyrylǵan Qaraǵandy oblysynyń Qaraqaraly aýdanynan kelgen Araılym Murat ta atalǵan bilim grantyna iligip, Qaraǵandy memlekettik Bóketov atyndaǵy ýnıversıtette týrızm mamandyǵy boıynsha bilim alǵaly otyrǵandyǵyn jetkizdi. «Sara Alpysqyzyna degen alǵysym sheksiz. Bul men úshin úlken syılyq. Sabaǵymdy jaqsy oqyp, maǵan artylǵan úmitti abyroıly aqtaımyn degen oıdamyn», -deıdi A.Murat.
Jıyn sońy kontserttik baǵdarlamaǵa ulasyp, otandyq estrada juldyzdary óner kórsetýde. Tún batqanda baıqaý jeńimpazdarynyń qurmetine merekelik otshashý berilmek.
