Sapta júrý tásilindegi jańa ózgerister sarbazdyń densaýlyǵyna túsetin júktemeni azaıtady - QR Qorǵanys mınıstrligi

ASTANA. QazAqparat - Búgingi tańda saptyq aıla-tásilder, ıaǵnı, saptyq adymnyń uzyndyǵy, bıiktigi jáne qarqyny ózgerdi. Endi áskerı qyzmetshilerdiń adymynyń uzyndyǵy 80-nen 70 santımetrge deıin qysqardy, adym jyldamdyǵy mınýtyna 120-dan 105 qadamǵa deıin, al adymnyń bıiktigi 20-dan 15 santımetrge deıin azaıtyldy, dep habarlady QR Qorǵanys mınıstrliginiń baspasóz qyzmetinen.

«Bul kúnge deıin qoldanylyp kelgen saptyq adym kúrdelengen bolatyn jáne uzaq jyldar boıy qoldanylyp keldi. Qazirgi zamanǵy qazaqstandyq áskerı qyzmetshiniń tolyq amýnıtsııadaǵy jaýyngerlik jaraqtandyrylýy 25 kelige deıin jetedi. Sáıkesinshe, áskerı qyzmetshiniń sapta uzaq qashyqtyqqa almasýy anaǵurlym kúsh-jigerdi qajet etedi», - dedi QR QK Áskerı polıtsııasy bas basqarmasynyń (áskerler qyzmeti jónindegi) bastyǵy polkovnık Alekseı Skornıakov.

Qurlyq áskerleri Áskerı ınstıtýtynyń bazasynda zertteý júrgizildi. Jumys toby udaıy negizde áreket etetin armııanyń tájirıbesin zerdeledi. Onyń nátıjeleri men medıtsınalyq kórsetilimderi budan buryn qoldanylǵan saptyq adym áskerı qyzmetshilerdiń súıek-bulshyq et júıesine artyq júkteme túsirgenin rastaıdy. Al jańadan engizilgen ózgeris áskerı qyzmetshilerdiń súıek-bulshyq et júıesine túsetin júktemeni azaıtýǵa, jaýyngerlik tapsyrmalardy oryndaý aldynda olardyń sharshaýyn tómendetýge, saptyń tártibin, saptaǵy túzelýdi arttyrýǵa múmkindik týǵyzdy.