«Sapsan» jedel tobynyń negizgi mindeti belgili boldy
ASTANA. QazAqparat - QR AShM janynda qurylǵan «Sapsan» jedel toby tabıǵatty qorǵaý zańnamasyn buzýdyń 18 faktisin anyqtady. Bul týraly brıfıngte Aýyl sharýashylyǵy vıtse-mınıstri Erlan Nysanbaev málim etti, dep habarlaıdy QazAqparat.
Atap aıtqanda, jedel toptyń negizgi mindetteri orman sharýashylyǵy jáne erekshe qorǵalatyn tabıǵı aýmaqtardy qorǵaý, molyqtyrý jáne paıdalaný salasyndaǵy memlekettik baqylaý men qadaǵalaýdy uıymdastyrý ári júzege asyrý jónindegi qyzmetine ishki baqylaý jasaý, sondaı-aq bul qyzmetterdegi laýazymdy tulǵalar tarapynan osy salalarda jasalǵan quqyq buzýshylyqtardy anyqtaý bolyp tabylady.
«Sapsan» 12 adamnan turady. Olar jol talǵamaıtyn 4 avtokólikpen, zamanaýı baılanyspen, tabeldik qarýmen jabdyqtalǵan. Jedel toptyń quramyn QR Premer-Mınıstriniń orynbasary - Aýyl sharýashylyǵy mınıstri A. Myrzahmetov bekitken jáne olar tikeleı mınıstrge baǵynady. Bul toptyń júretin baǵdary jaıynda eshkim bilmeıdi, bul óz kezeginde brakonerlerge qarsy jedel áreket etýge múmkindik beredi.
Sonymen qatar, laýazymdy tulǵalarynyń tarapynan jasalǵan sybaılas jemqorlyq quqyq buzýshylyqtaryn anyqtaý jáne aldyn alý; janýarlar dúnıesin qorǵaý, ósimin molaıtý jáne paıdalaný, orman sharýashylyǵy men erekshe qorǵalatyn tabıǵı aýmaqtar salasynda jasalǵan quqyq buzýshylyqtardy, jedel top aýyl sharýashylyǵy Mınıstrine rastaıtyn materıaldardy qosa tirkep, usynatyn bolady.
E. Nysanbaevtyń sózine qaraǵanda, 2017 jyldyń maýsym aıynan bastap búgingi kúnge deıin jedel toptyń atqarǵan jumysynyń nátıjesi boıynsha tabıǵatty qorǵaý zańnamasyn buzǵan 18 fakt tirkeldi. Anyqtalǵan fakt boıynsha 3 qylmystyq is jáne 15 ákimshilik is qozǵaldy.
Budan bólek, QR AShM Orman sharýashylyǵy jáne janýarlar dúnıesi komıtetiniń laýazymdy tulǵalaryna, aýmaqtyq bólimsheleri men vedomstvolyq baǵynystaǵy uıymdarynyń qyzmetkerlerine tártiptik jazalar qoldanyldy.
