«Sapporo-2017» Azııa oıyndaryna qatysatyn Qazaqstan quramasy anyqtaldy
ASTANA. QazAqparat - Astanada 2017 jylǵy qysqy Azııa oıyndary men 2018 jylǵy qysqy Olımpıada oıyndaryna daıyndyq máselelerine arnalǵan jıyn ótti, dep xabarlaıdy QazAqparat UOK baspasóz qyzmetine silteme jasap.
Astanada Qazaqstan Respýblıkasy Ulttyq Olımpıadalyq komıteti men mádenıet jáne sport mınıstrliginiń Astanada 2017 jyly Sapporodaǵy qysqy Azııa oıyndary men 2018 jyly Phenchandaǵy qysqy Olımpıada oıyndaryna qysqy sport túrlerinen ulttyq qurama komandalardyń daıyndyq máselelerine arnalǵan birlesken otyrys ótti.
QR UOK prezıdenti Tımýr Qulybaevtyń tóraǵalyǵymen ótken otyrysqa QR Premer-Mınıstriniń birinshi orynbasary, QR UOK qysqy sport túrleri boıynsha vıtse-prezıdenti Asqar Mamın, QR mádenıet jáne sport mınıstri Arystanbek Muhamedıuly, qysqy sport túrlerinen ulttyq federatsııalardyń basshylary qatysty.
Qazaqstandyq sportshylar táýelsizdikten keıin qatysqan Olımpıada oıyndarynda bir altyn, úsh kúmis jáne úsh qola medal jeńip alǵan. Qazirgi tańda 2018 jyly Ońtústik Koreıada ótetin qysqy Olımpıada oıyndaryna irikteý jarystary ótip jatyr. Olımpıadalyq lıtsenzııalarǵa kúres endi ǵana bastalýda. 2010 jyly Vankýver Olımpıadasyna qazaqstandyqtar 8 sport túri boıynsha 37 lıtsenzııany ıelense, Sochı qalasyndaǵy qysqy Olımpıada Oıyndaryna 10 sport túri boıynsha 52 lıtsenzııaǵa qol jetkizgen bolatyn. 2018 jyly Ońtústik Koreıadaǵy Olımpıadada bizdiń sportshylar lıtsenzııa men júldeler sany boıynsha kórsetkishterdi jaqsartýdy kózdep otyr.
"2017 jyly Sapporoda ótetin Azııa oıyndaryna qatysatyn Qazaqstan quramasy anyqtaldy. Japonııada el namysyn 116 sportshy qorǵaıdy. Olardyń ishinde, Denıs Ten, Elızabet Tursynbaeva (mánerlep syrǵanaý), Roman Krech (konkımen júgirý sporty), Dmıtrıı Reıherd (frıstaıl) syndy atletter, shaıbaly hokkeıden erler jáne áıelder komandalary bar. VIII qysqy Azııa Oıyndarynyń ashylý saltanatynda Qazaqstannyń týyn shańǵyshy Erdos Ahmadıev ustap shyǵady", - delingen xabarlamada.
