Sápıevten estafeta qabyldaǵan Levıt balalar úıinde boldy
ASTANA. QazAqparat - Olımpıada oıyndarynyń kúmis júldegeri, boksshy Vasılıı Levıt Qaraǵandyda «Qulynshaq» balalar úıinde boldy, dep habarlaıdy QazAqparat oblys ákimdiginiń baspasóz qyzmetine silteme jasap.
«Biz birgemiz!» atty aktsııany QR Parlamenti Májilisiniń depýtaty, Olımpıada jeńimpazy Serik Sápıev bastaǵan bolatyn. Ol «Tańsholpan» balalar úıiniń tárbıelenýshilerimen kezdesip, óziniń jetistikterimen bólisken edi. Keıin Sápıev ıgi estafetany sporttaǵy óziniń áriptesi Vasılıı Levıtke berdi.
«Qulynshaq» balalar úıiniń búldirshinderi Vasılıımen kezdesýdi taǵatsyzdana kútti. Zalǵa sportpen shuǵyldanatyn jáne qandaı da bir jetistikterge jetip úlgergen ul-qyzdar jınaldy.
Olımpıada júldegeri kishkentaı kezinde mılıtsıoner bolǵysy kelgenin jetkizdi. «Óz armanymdy sál de bolsyn oryndadym - Ulttyq gvardııada qyzmet etemin, - dedi ol.
Boksshynyń birinshi qyzyqqan sport túri kıkboksıng bolǵan eken. Onymen jeti jasynda aınalysa bastaǵan. Orta synyptarda kóńili boksqa aýǵan jáne keıinirek tolyqtaı osy sport túrine aýysýǵa bel býǵan.
«Árıne, balalyq shaǵymda jattyǵýdan qashyp ketýdi oılaıtynmyn. Alaıda ózińdi qolǵa alyp, basty maqsatyń týraly oılaısyń - bul álsizdik sátterine tótep berýge kúsh beredi. Jınalasyń da, jattyǵýǵa ketesiń», - dep shyndyǵyn aıtty Levıt.
Ol balalarǵa óz keńesterin de berdi: úlkenderdi tyńdaý, qansha jerden aýyr bolsa da alǵan betinen taımaý jáne uıatqa qalmaý. Sportshy jeńister men jeńilisterden sabaq alýǵa shaqyrdy.
Vasılıı Levıt óz kezeginde estafetany Qaraǵandy qalasynyń týmasy, akter Ánýar Núrpeıisovke berdi.
Shara uıymdastyrýshysy - oblystyq Qazaqstan halqy Assambleıasy Jastar birlestikteriniń úılestirý keńesi.
